"Не палітычнае рашэнне" — Макрон пракаментаваў затрыманне Дурава

Эманюэль Макрон выказаўся з нагоды затрымання заснавальніка і кіраўніка Telegram Паўла Дурава. "Гэта ніяк не палітычнае рашэнне", — напісаў прэзідэнт Францыі ў сацсетках.

Макрон падкрэсліў, што Францы глыбока прыхільная свабодзе слова і камунікацыі, інавацыям і духу прадпрымальніцтва.

"У дзяржаве, дзе кіруе вяршэнства закона, свабоды падтрымліваюцца ў рамках закона, як у сацыяльных сетках, так і ў рэальным жыцці, каб абараняць грамадзян і паважаць іх асноўныя правы.

Судовая сістэма, цалкам незалежная, павінна забяспечваць выкананне закона. Арышт кіраўніка Telegram на французскай зямлі адбыўся ў рамках судовага расследавання", — падкрэсліў ён.

Паўла Дурава затрымалі 24 жніўня ў аэрапорце "Ле-Буржэ", калі ён прызямліўся і выйшаў са свайго прыватнага джэта.

Сёння французская паліцыя афіцыйна заявіла, што яго вінавацяць у адмове ад супрацоўніцтва ў сувязі з фінансавымі і кіберзлачынствамі ў Telegram.