Naka.. Pomidor/off... ці 8 сакавіка?

Вееельмі розныя Naka і Pomidor/off нечакана для большасці фанатаў абодвух гуртоў вырашылі даць супольны канцэрт і такім чынам адсвяткаваць 8-е сакавіка. Апошнім часам Naka ўвогуле не ладзіць сольных канцэртаў – толькі за апошні час гурт адыграў «жаночы» канцэрт з Indra і Тарпач, з расійскім госцем «Барто» ды іншымі. Калі з канцэртамі  Naka усё больш-менш зразумела, то вось  Pomidor/off апошні раз выступаў у Мінску прыкладна год таму.



Спачатку сцэну даверылі  гурту «Pomidor/off», выканаўцу больш "цяжкага" накірунку беларускай рок-музыкі. Харызматычнага і іранічнага А. Памідорава і яго гурт "Pomidor/OFF" упадабалі нават тыя, хто відавочна прыйшоў паслухаць усё ж такі Naku. Здаровая доля драйву і пэўная хвалю аптымізму ад Памідорава парадавалі і ўзрушылі публіку, але ж на танцпляц выйшлі ўсё ж нешматлікія. На жаль.


Спявачку з пранізлівым жаночым вакалам і мужчынскім драйвам – як часта называюць  Анастасію Шпакоўскую, -  безумоўна ў залі чакалі і сустракалі адпаведна. Роўна настолькі, наколькі магла зрабіць гэтая колькасць прысутных. Вельмі адчуваецца тое, што вакалістка «Naka» Насця – акторка, таму і выступ яе падобны на спектакль, дзе кожная песня – новая дзея.


Глядачка: «На сённяшні дзень я лічу, што Насця – адна з самых яркіх і самадастатковых фігур  беларускай сцэны. Яна «чапляе» глыбінёй зместу сваіх тэкстаў, а прастата мелодыі толькі падкрэслівае гэта. Мне вельмі падабаецца чысціня саунда гэтага гурта – нічога лішняга.Насця – сапраўдны лідэр. А яшчэ таму, што яна акторка, я яе трэба не толькі чуць, але і бачыць – гэта незабыўна. Свой першы яе канцэрт я проста стала як ўкапаная і баялася паварушыцца і ўздыхнуць... Апладысменты пасля песні – гэта лішняе, глядзіце – танпляц проста замірае, калі выходзіць ЯНА. На маю думку Нака – гэта знаходка, не будзьце раўнадушнымі і пераўтварыце яе ў адкрыццё»


Гледачы і сапраўды доўга патрабавалі «біс», а, атрымаўшы песню «Беги», усё роўна працягвалі няспынна скандаваць «Naka»!



Тады нехта ў залі ўзгадаў пра Аляксандра і «на біс» выклікалі «Pomidor/off», які нечакана для ўсіх выканаў разам з Насцяй Шпакоўскай песню Чака Бэры  «Johnny B. Goode».




Думаю, у выніку для абодвух выканаўцаў гэты канцэрт стаў цікавым і карысным досведам. 

Фота: Валянцін Хасяневіч