З беларускіх рублёў прыбяруць подпіс Пятра Пракаповіча
Праўленне Нацыянальнага банка вырашыла памяняць дызайн некаторых банкнотаў, паведамляе прэс-служба ведамства. Пры гэтым купюры старога ўзору (2009 года выпуску) застануцца ў абарачэнні.
У мадыфікаваныя банкноты будуць унесены наступныя змены.
Выявы будынкаў на банкнотах будуць падпраўленыя ў адпаведнасці з іх цяперашнім выглядам. Да іх дададуцца назвы намаляваных будынкаў. Таксама з мадыфікаваных банкнотаў прыбяруць надпіс "Старшыня Праўлення" і факсіміле подпісу старшыні праўлення Нацбанка Пятра Пракаповіча. (Ён узначальваў Нацбанк у 1998-2011 гадах)
У адпаведнасці з новымі правіламі беларускай арфаграфіі на банкноце наміналам 50 рублёў надпіс "ПЯЦЬДЗЕСЯТ" будзе выпраўлены на "ПЯЦЬДЗЯСЯТ".
Таксама будзе выпраўлены і год выпуску банкнотаў — на планаваны. На купюрах наміналамі 5 і 10 рублёў замест "2009" будзе напісана "2019", на купюрах па 20 і 50 рублёў — "2020".
