На заводзе ў Гомелі на 3D-друкарцы вырабілі "карысны імпартазамяшчальны прадукт"
!["Дэманстрацыя новага абсталявання"](/sites/default/files/styles/gallery_main/public/2024-02/pompa1.jpg.webp?itok=9NajLZC6)
"Дэманстрацыя новага абсталявання" / mmz-motor.by
На Гомельскім заводзе пускавых рухавікоў, які ўваходзіць у холдынг Мінскага маторнага завода, на прамысловай 3D-друкарцы вырабілі "карысны імпартазамяшчальны прадукт". На радасцях на прадпрыемстве арганізавалі "дэманстрацыю новага абсталявання".
Як піша mmz-motor.by, у Гомелі вырабілі цэнтрабежную помпу, якую раней набывалі за мяжой. Яна прызначана для перапампоўкі вады, а яе прадукцыйнасць складае 280 м3 за гадзіну (выкарыстоўваецца ў гарадской каналізацыі, у аграпрамысловым комплексе). Калі выпрабаванні будуць паспяховыя, завод пускавых рухавікоў збіраецца пачаць серыйны выпуск (плануецца да 100 адзінак у 2025 годзе). Праўда, часам "імпартазамяшчэнне" не дае пазітыўных вынікаў, як адбываецца з аўтобусамі МАЗ, якія так часта гараць падчас руху. Цяпер жа трывожна за гарадскую каналізацыю.
![На заводзе ў Гомелі на 3D-друкарцы вырабілі "карысны імпартазамяшчальны прадукт"](/sites/default/files/styles/default_image_paragraph/public/paragraphs/image/f6fcf7c79d6a3d05b149a3230693a79f.jpg.webp?itok=e7LR5OtX)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.