На тэставанні па матэматыцы ў чатыры разы больш “завалаў”, чым летась

01/07/2013 - 19:37

Траціна абітурыентаў сёлета хацела, але на зможа паступіць ва ўнівер: маладыя людзі не маюць неабходных 15 балаў па фізіцы і матэматыцы. На тэхнічных факультэтах хвалююцца: не хопіць студэнтаў.

“На педагагічных спецыяльнасцях вялікія праблемы будуць. Яшчэ летась на “навукова-педагагічную дзейнасць”, на фізіку быў недабор. Чалавек пяць не дабралі, нават на бюджэт”, — адказваюць Еўрарадыё на фізіка-матэматычным факультэце Брэсцкага дзяржаўнага ўніверсітэта імя Пушкіна.

На фізфаку БДУ ўпэўненыя: мяжа ў 15 балаў была патрэбная, каб не вучыць двоечнікаў. Але таксама прагназуюць недабор.

“Калі траціна людзей не можа асіліць матэматыку, ну што тады рабіць… Нельга далей апускаць планку”, — кажуць на фізфаку.

І наракаюць, што летась недабор быў амаль па ўсіх тэхнічных спецыяльнасцях. Пры гэтым у мінулым годзе, каб паступіць, трэба было набраць 7 балаў на тэсціраванні. Гэтага не змаглі зрабіць 3 тысячы тых, хто здаваў фізіку і 11 тысяч гора-матэматыкаў.

Вынікі тэстаў не горшыя за леташнія, адразу кажуць Еўрарадыё ў Міністэрстве адукацыі. Таму што тут налічылі 46 выдатнікаў па фізіцы і 146 па матэматыцы. Гэта рэкорд!

“Калі выстаўлялі неабходныя для паступлення балы, мы ж падлічвалі неабходную колькасць людзей, якія патрэбныя у эканоміцы краіны. Асноўная мэта — гэта бюджэтныя месцы, якія патрэбныя ў краіне. А калі ён не цягне, то хто ж дапаможа”, — тлумачаць у міністэрстве.

І прыгадваюць вынікі па фізіцы. Маўляў, 37% не набралі неабходныя балы. Але 63% — набралі!

Універсітэты сёлета застануцца без студэнтаў, дае невясёлыя прагнозы рэпетытар Яўген Лівянт. Але заданні на тэставанні ацэньвае добра: усё адпавядала школьнай праграме.

Яўген Лівянт: “Тэсты па фізіцы былі ідэальныя, іх можна было зрабіць. І па матэматыцы тэсты добрыя. Калі вучань рыхтаваўся, ён мог здаць. І столькі выдатнікаў ніколі не было. А вялікі адсотак тых, хто не набраў 15 балаў — гэта нізкі ўзровень адукацыі. Педагагічныя ВНУ не набяруць студэнтаў, завочнае аддзяленне не набярэ”.

Сёлета і без таго на цэнтралізаванае тэставанне запісаліся 117 тысяч абітурыентаў, а летась была 141 тысяча.

Вынікі тэставання сёлета і летась:

2013 год	прадмет	Не набралі неабходныя балы	Выдатнікі	Колькасць удзельнікаў	Не набралі ніводнага бала
	Фізіка	37%	46	35 763	66
	Матэматыка	32,7%	146	76 021	111
	Руская мова	8%	39	83 829	16
	Грамадствазнаўства	6,9%	7	7 672	2
	Біялогія	5%	4	24 658	4
	Беларуская мова	5%	6	33 564	4

2012 год	прадмет	Не набралі неабходныя балы	Выдатнікі	Колькасць удзельнікаў		Не набралі ніводнага бала
	Фізіка	9%	2	44 119		41
	Матэматыка	Каля 9%	46	95 161		796
	Руская мова	3%	19	95 896		3
	Грамадствазнаўства	0,2%	5	9 440		2
	Біялогія	0,15 %	7	28 636		3
	Беларуская мова	2,65%	7	45 199		1
	Хімія	30 чалавек	17	16 687		3
	Геаграфія	8 чалавек	3	2 363		0
	Гісторыя Беларусі	0,05%	16	21 653		1
	Сусветная гісторыя	3 чалавекі	0		1 873	0