На сям'ю беларусаў у Быдгашчы напала сям'я палякаў

Сям'я беларусаў у Быдгашчы стала мішэнню для нападу з боку сям'і палякаў. Інцыдэнт скончыўся ўжываннем сілы і выклікам паліцыі, піша выданне MOST.

Здарэнне адбылося 18 ліпеня. Алена і Віталь, якія пакінулі Беларусь пад пагрозай палітычнага пераследу, чакалі аўтобус на прыпынку. Туды ж прыйшла польская сям'я з двума дзецьмі. Спачатку паляк мэтанакіравана пускаў цыгарэтны дым у твар Алене. Беларуска зрабіла яму заўвагу, дадаўшы пра забарону палення на прыпынках, і адышла да мужа. Паляк пачаў іх абражаць — з яго словаў вынікала, што ён прыняў іх за ўкраінцаў. Потым мужчына стаў пляваць на спіну беларусцы.

"Потым чую — плявок. Я стаяла да яго спінай. Думаю: "Пакурыў — плюнуў". Потым чую [больш моцны плявок] — і ўсе смяюцца. На трэці ці чацвёрты раз я адчула плявок праз кофту. Здымаю — а ў мяне ўся спіна абхарканая", — апісвае Алена.

Віталь заступіўся за жонку, тады паляк падбег да яго і пачаў душыць. Паміж мужчынамі пачалася бойка. Да яе далучылася і жонка нападніка: на відэа, якое Алена паспела зняць, відаць, як тая цягне Віталя за футболку і валасы. Старэйшы сын палякаў спрабаваў разняць бойку і суцішыць нападнікаў.

Калі пад'ехаў аўтобус, беларусы паспрабавалі паехаць на ім. Але жонка паляка пабачыла, што беларуска вяла здымкі і выхапіла ў яе тэлефон. Алена хацела забраць тэлефон. Таго ж ад маці прасіў і старэйшы сын польскай пары. Па словах Алены, жанчына кінула ў яе тэлефонам, пасля чаго накінулася на яе. Віталь паспрабаваў іх разняць, але да канфлікту зноў далучыўся паляк, які пачаў біць беларуса.

Алена падабрала тэлефон і выклікала паліцыю. Пабачыўшы гэта, палякі пакінулі месца здарэння. "У мужа ўвесь твар і майка былі ў крыві. Лоб быў разбіты, над брывом — рассяканне, з носа цякла кроў", — кажа жанчына.

Хуткая дапамога, са слоў Алены, прыехала праз 40 хвілін, а паліцыя — праз 45. Увесь гэты час муж і жонка чакалі іх на прыпынку. Віталя пасля ўколу адвезлі ў бальніцу. Яму зрабілі камп'ютарную тамаграфію галаўнога мозгу і тваравай часткі чэрапа без увядзення кантраснага рэчыва. Даследаванне не выявіла кровазліцця, пераломаў або бачных вострых пашкоджанняў галаўнога мозгу.

Пасля гэтага беларусаў апыталі ў паліцыі. "Было відаць, што яны вельмі сур'ёзна ставяцца да гэтай справы. Адразу паехалі ў гандлёвы цэнтр, які там недалёка, здымаць запісы з камер. Шукалі іншыя магчымыя камеры. Знайшлі аўтобус і кіроўцу, які [у той момант] пад'язджаў да прыпынку. Калі нас дапытвалі, нават тэлефанаваў камендант і вельмі цікавіўся ходам справы і тым, як пачуваецца мой муж", — расказвае беларуска.