На маёмасць старшыні Партыі БНФ Рыгора Кастусёва наклалі абмежаванні

На маёмасць старшыні Партыі БНФ Рыгора Кастусёва наклалі абмежаванні

Аддзел прымусовала выканання Шклоўскага раёна 19 кастрычніка наклаў абмежаванні на маёмасць старшыні Партыі БНФ Рыгора Кастусёва. Фармулёўка: дзеля забеспячэння аплаты штрафу за ўдзел у акцыі пратэсту супраць рэстарана “Паедзем паядзім” ва ўрочышчы Курапаты. Сам палітык сцвярджае, што ўсе штрафы ён сплаціў.

Тым не менш яму даслалі пакет дакументаў, з якіх вынікае, што ён не можа здзяйсняць рэгістрацыйныя дзеянні са сваім аўтамабілем і гаражом. У выніку Кастусёву давялося займацца “камунікацыяй” паміж судамі ў Мінску, якія прысудзілі штрафы, і судовымі выканаўцамі ў Шклове, якія наклалі абмежаванні на маёмасць, паведамляе TUT.by са спасылкай на БелаПАН.

Кастусёў мяркуе, што гэта “дробная помста” за пададзеную ў Камітэт ААН па правах чалавека скаргу на выкарыстанне адміністратыўнага пераследу як сродку абмежавання свабоды сходаў у Беларусі.

4 ліпеня суд Партызанскага раёна Мінска аштрафаваў Рыгора Кастусёва на 30 базавых велічыняў (735 рублёў) за ўдзел у акцыі ў Курапатах. Напярэдадні суда палітыка затрымалі раніцай па дарозе на Мінск з боку Магілёва. Ён накіроўваўся праз сталіцу ў аэрапорт, каб вылецець у Варшаву для ўдзелу ў пасяджэнні міжнароднай камісіі польскага сейма.

Апошнія навіны

Галоўнае

Выбар рэдакцыі