На Гомельшчыне 21 чалавека пакаралі за самагубствы пенсіянераў
![Пракуратура праверыла, як сацслужбы працуюць з пенсіянерамі на Гомельшчыне / pexels.com](/sites/default/files/styles/gallery_main/public/2023-08/pensy-2706.jpg.webp?itok=FdggfppS)
Пракуратура праверыла, як сацслужбы працуюць з пенсіянерамі на Гомельшчыне / pexels.com
21 службовую асобу ўстаноў аховы здароўя і сацыяльнай абароны прыцягнулі да дысцыплінарнай адказнасці на Гомельшчыне. Гэта адбылося пасля таго, як пракуратура вобласці праверыла, як у рэгіёне ідзе работа па папярэджанні самагубстваў сярод пажылых людзей.
У пракуратуры заяўляюць, што прычынамі суіцыдаў сярод пенсіянераў становяцца сыход ад актыўнага сацыяльна-культурнага жыцця, зніжэнне фізічнай актыўнасці, цяжкая хвароба і адзінота. Прафілактыка ў гэтай сферы на Гомельшчыне, на думку пракурораў, наладжаная неадпаведным чынам. Пенсіянерам не прапаноўвалі псіхалагічную дапамогу, не імкнуліся выявіць асоб з групы рызыкі. "Нягледзячы на наяўнасць службаў бясплатнай псіхалагічнай падтрымкі ў людзей пенсійнага ўзросту, асабліва ў сельскай мясцовасці, адсутнічала культура звароту ў такія службы", — заяўляюць у пракуратуры.
Пракурорскія работнікі выявілі факты неналежнага аказання сацыяльных паслуг пажылым, якія ўчынілі самагубства. Таксама своечасова не прымаліся меры па лячэнні грамадзян з групы рызыкі ад алкагольнай залежнасці і спадарожных псіхатраўмуючых з'яў.
Паведамляецца, што нярэдка на суіцыд наважваліся людзі з цяжкімі захворваннямі, у тым ліку анкалагічнымі. "У такіх сітуацыях асаблівае значэнне мае аказанне якаснай паліятыўнай дапамогі, у якую ўваходзяць медыцынскія ўмяшанні, мерапрыемствы псіхалагічнага характару, а таксама меры сацыяльнай падтрымкі. У шэрагу выпадкаў аказаныя суб'ектамі прафілактыкі паслугі не адпавядалі патрабаванням заканадаўства", — канстатуюць у пракуратуры.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.