Мужчына прымёрз босымі нагамі да жалезнага даху дома
Мужчына прымёрз босымі нагамі да жалезнага даху аднапавярховага прыватнага дома. Ён не мог паварушыцца і пачаў клікаць на дапамогу. Пра гэтае здарэнне ў Адэсе на сваёй старонцы ў Facebook распавядае патрульная паліцыя Адэскай вобласці Украіны.
Позна ўвечары 6 лютага праваахоўнікаў выклікалі суседзі, якія пачулі крыкі мужчыны. Для таго, каб дапамагчы пацярпеламу, знайшлі механічны пад’ёмнік. Паліцэйскія здолелі вызваліць ногі з лядовага палону, мужчыну перадалі медыкам. Пра яго стан здароўя нічога не паведамляецца. Дарэчы, пацярпелы не змог патлумачыць, што ён рабіў босы ў мароз на даху.
