Мірны спазняецца ў Швейцарыю на матч Кубка Дэвіса — перашкодзіў ураган "Ірма"
Ураган "Ірма" перашкодзіў беларускаму тэнісісту Максіму Мірнаму своечасова прыбыць на выязны матч плэй-оф за выхад у Сусветную групу Кубка Дэвіса са Швейцарыяй. Пра гэта агенцтву БЕЛТА паведамілі ў прэс-службе Беларускай федэрацыі тэніса.
Планавалася, што лідар беларускай каманды 11 верасня прыляціць з Фларыды, дзе жыве яго сям'я. Аднак планы моцна падкарэктаваў ураган "Ірма", які пануе ў рэгіёне.
10 верасня мужчынская зборная Беларусі адправілася ў Біль, дзе праводзіць трэніроўкі. У тэнісную зборную не трапілі траўмаваныя Ягор Герасімаў і Ілля Івашка. Замест іх паехалі Яраслаў Шыла і Дзмітрый Жырмонт. У дуэце з Мірным плануе выступаць Андрэй Васілеўскі. Акрамя таго, капітан каманды Уладзімір Ваўчкоў узяў на матч двух маладых гульцоў — Аляксандра Згіроўскага і Аляксандра Леаненку.
Перад гэтым беларускія тэнісісты атрымалі перамогу над аўстрыйцамі (3:1). Зборная Швейцарыі ў першым раўндзе Сусветнай групы прайграла ў гасцях камандзе ЗША — 0:5.
Пераможца матчу Швейцарыя — Беларусь, які пройдзе з 15 па 17 верасня, у наступным сезоне згуляе ў Сусветнай групе. Каманда, якая прайграла, будзе выступаць у I групе Еўра-Афрыканскай зоны Кубка Дэвіса.
Апошні раз каманда Беларусі выступала ў Сусветнай групе 10 гадоў таму. Найлепшы дасягненнем нашых тэнісістаў з'яўляецца выхад у паўфінал у 2004 годзе.
Склады астатніх параў плэй-оф Сусветнай групы: Канада — Індыя, Венгрыя — Расія, Калумбія — Харватыя, Нідэрланды — Чэхія, Японія — Бразілія, Партугалія — Германія, Казахстан — Аргенціна.
