Мінскія ўлады забаранілі пікет “Без візы!” ля “Чыжоўка-Арэны”
Актывістку з Салігорску Вікторыю Фогель выклікалі ў мясцовае аддзяленне міліцыі, дзе папярэдзілі пра недапушчальнасць супрацьпраўных дзеянняў.
Выклік у міліцыю быў звязаны з яе заяўкай на правядзенне пікету ў падтрымку кампаніі “Без візы!”. Мерапрыемства планавалася правесці ў Мінску 11 траўня на пляцоўцы ля спорткомплексу “Чыжоўка-Арэна”. Сталічныя ўлады заявы актывісткі не задаволілі. Ладзіць акцыю Вікторыя Фогель не збіралася.
Аднак салігорскія міліцыянты выклікалі яе ў аддзяленне, заявілі пра недапушчальнасць правядзення забароненага мерапрыемства і прымусілі падпісаць адпаведнае папярэджанне, інфармуе БелаПАН.
