Мінскі суд аштрафаваў брата Дар'і Домрачавай за ўдзел у акцыі пратэсту

Домрачаў быў затрыманы падчас Маршу годнасці 11 кастрычніка. Ён ехаў на ровары па набярэжнай Свіслачы — па яго словах, каб адведаць маці. Маладога чалавека сілавікі сцягнулі з ровара і моцна збілі. З РУУС яго забрала хуткая дапамога. Пазней СМІ апублікавалі здымкі збітага Мікіты. Ён расказваў, што яму на галаву наклалі тры швы. "Таксама пабоі на ўсім целе ад дубінак", — казаў брат Домрачавай.

Домрачава тады вельмі асцярожна пракаментавала збіццё брата: усе бакі не маюць рацыі, а яна не хацела б сваімі выказваннямі павышаць градус напружання ў грамадстве.

"Мы хочам справядлівасці, гарантый бяспекі і павагі да сябе, — пісаў Мікіта Домрачаў у Facebook. — Мы хочам жыць у цывілізаваным свеце. Мы хочам жыць у Новай Беларусі 21 стагоддзя".