Мінскі метрапалітэн расказаў, колькі чалавек можа там схавацца
![У мінскім метро могуць схавацца каля 5% жыхароў сталіцы](/sites/default/files/styles/gallery_main/public/2024-03/metro-2503.jpg.webp?itok=4IVRT4DK)
У мінскім метро могуць схавацца каля 5% жыхароў сталіцы / tvr.by
Пры надзвычайных сітуацыях у мінскім метро могуць схавацца каля 100 тысяч чалавек — гэта прыкладна 5% насельніцтва сталіцы. Такую лічбу назваў у інтэрв'ю БТ афіцыйны прадстаўнік метрапалітэна Андрэй Дроб.
Па яго словах, пры надзвычайнай сітуацыі метро хавае пасажыраў, якія знаходзяцца на станцыі, а таксама людзей, якія жывуць ці працуюць у межах 500 м ад гэтай станцыі.
"Вядома, калі адбываецца нейкая сітуацыя, тут моцна ніхто не будзе прама разбірацца, але, тым не менш, гэтыя людзі павінны ведаць, што ў межах 500 метраў ёсць такая станцыя, на ёй можна схавацца ў выпадку надзвычайнай сітуацыі", — распавядае Дроб.
У падземцы могуць схавацца больш за 100 тысяч чалавек, а пасля адкрыцця новых станцый паказчык ёмістасці — значна больш. Склады — таксама падвойнага прызначэння. У асаблівых выпадках вагоны ператвараюцца ў шпіталь, а на станцыі абавязкова з'явяцца медыкі.
Паведамляецца, што гермазатворы здольныя абараніць станцыю ад знешняга ўздзеяння — ад ударнай хвалі, радыяцыі, хімічнай атакі.
Таксама на БТ паведамілі, што пад паняцце хованкі падпадаюць падвалы, паркінгі, падземныя паверхі — тое, што знаходзіцца ніжэй за ўзровень зямлі і надзейна абаронена зверху.
Акрамя таго, на БТ заявілі, што мапы бліжэйшых хованак для насельніцтва "з'явяцца адразу" ў выпадку надзвычайных сітуацый, а пакуль што яны засакрэчаныя.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.