Міністр абароны Польшчы: зніклы салдат меў сур'ёзныя праблемы з законам
Міністр абароны Польшчы Марыюш Блашчак пракаментаваў у Твітары інцыдэнт са зніклым вайскоўцам.
"У салдата, які знік учора, былі сур'ёзныя праблемы з законам, і ён падаў заяву аб звальненні з арміі. Ён ніколі не мусіў быць накіраваны на службу на мяжу. Я запатрабаваў тлумачэнняў, хто вінаваты", — напісаў Блашчак.
Падпісчыкі запыталіся ў міністра, якім чынам у польскім войску апынуўся чалавек, які мае "сур'ёзныя праблемы з законам" і чаму яго накіравалі на такі важны ўчастак, як беларуска-польская мяжа.
Зранку 17 снежня беларускія памежнікі паведамілі пра пераход польскага салдата на беларускі бок. Эміль Чэчка, па іх словах, папрасіў палітычнага прытулку, бо нязгодны з палітыкай Польшчы ў міграцыйным крызісе.
Неўзабаве стала вядома, што беларускія прапагандысты робяць інтэрв'ю з палякам.
Польскія СМІ адзначаюць, што вайсковец перайшоў на беларускі бок без зброі.
Żołnierz, który wczoraj zaginął miał poważne kłopoty z prawem i złożył wypowiedzenie z wojska. Nigdy nie powinen zostać skierowany do służby na granicę. Zażądałem wyjaśnień, kto za to odpowiada.
— Mariusz Błaszczak (@mblaszczak) December 17, 2021
