Міністр абароны ФРГ назваў прадказальным вывад амерыканскіх вайскоўцаў з Еўропы
Частка амерыканскіх вайскоўцаў пакіне Германію / BLOOMBERG
ЗША выведуць з тэрыторыі Германіі 5000 салдатаў. Адпаведнае рашэнне прыняў прэзідэнт краіны Дональд Трамп.
Міністр абароны ФРГ Барыс Пісторыус назваў гэтае рашэнне прадказальным. "Тое, што ЗША выведуць войскі з Еўропы, уключаючы Германію, было прадказальна. Цяпер гаворка ідзе пра 5000 амерыканскіх вайскоўцаў з амаль 40 тысяч, якія цяпер дыслакаваныя ў Нямеччыне", — перадае яго словы DW.
Разам з тым Пісторыус падкрэсліў, што прысутнасць амерыканскіх войскаў у Еўропе застаецца ў інтарэсах абодвух бакоў.
На яго думку, гэтыя падзеі даказваюць, што NATO павінна стаць "больш еўрапейскай" арганізацыяй. Еўрапейскія дзяржавы ў складзе Паўночнаатлантычнага альянсу мусяць у такіх умовах браць на сябе больш адказнасці за сваю бяспеку.
Кіраўнік Пентагона Піт Хегсет аддаў загад вывесці каля 5000 амерыканскіх вайскоўцаў з Германіі на працягу года. Раней Трамп напісаў у сваёй сацсетцы Truth Social, што ЗША разглядаюць магчымасць скарачэння колькасці свайго кантынгенту ў ФРГ.
