Мэр Мінска хоча знізіць кошты ў трох- і чатырохзоркавых гасцініцах

Задачу знізіць кошт пражывання ў трох- і чатырохзоркавых гасцініцах Мінска паставіў старшыня Мінгарвыканкама Андрэй Шорац. На аператыўнай нарадзе ў мэрыі ён звярнуў увагу на тое, што кошт пражывання ў мінскіх гасцініцах вышэйшы, чым у гатэлях Варшавы, Вільні і Рыгі. "І калі мы хочам прыцягнуць у наступным годзе ў сталіцу каля 200 тысяч турыстаў з рэгіёнаў, то неабходна папрацаваць у гэтым кірунку", — цытуе словы Шораца БЕЛТА.

Старшыня Мінгарвыканкама паставіў задачу "выпрацаваць адзіную палітыку па фармаванні цэнаў на гасцінічныя нумары".

Як заявіў начальнік Упраўлення бытавога і гасцінічнага абслугоўвання  Мінгарвыканкама Андрэй Новікаў, сталічныя гасцініцы восенню 2014-га выйшлі на рэнтабельны ўзровень работы і рыхтуюцца да навагодняга наплыву гасцей. Іх чакаецца да 6500 чалавек, паведамляе агенцтва "Мінск-навіны".

Адзначым, што на сённяшні дзень у Мінску функцыянуюць 44 гасцініцы на больш чым 9 тысяч месцаў.