Малады чалавек за месяц зняў, а пасля пераздаў 10 кватэр
Малады чалавек за месяц зняў, а пасля пераздаў 10 кватэр (часам з перадаплатай на паўгода). Такім чынам ён зарабіў 3600 рублёў. У эфіры “Альфа Радыё” пра гэтую крымінальную гісторыю распавяла афіцыйная прадстаўніца Следчага камітэта Юлія Ганчарова, але не ўдакладніла, у якім горадзе яна адбылася. Паводле яе слоў, раней малады чалавек быў асуджаны на ўмоўны тэрмін на серыю крадзяжоў. Пасля заканчэння ВНУ ён часта мяняў месца працы, а пасля жыў за кошт выпадковых заробкаў.
Аднойчы хлопец прыдумаў, як зарабіць грошай, праўда, незаконна. Ён зняў кватэру, прыйшоў на сустрэчу з гаспадыняй са сваёй цяжарнай дзяўчынай. Было заплачана за месяц арэнды кватэры, але праз тры дні маладыя людзі з’ехалі. Зламыснік сказаў дзяўчыне, што ў кватэры кепскія ўмовы для жыцця з дзецьмі, і яны пераехалі ў іншую. Арандаваныя кватэры хлопец пераздаваў. У адной з іх у пакоі былі рэчы гаспадароў. Малады чалавек зламаў замок і вынес адтуль чужыя рэчы і прадаў іх, страты склалі 1200 рублёў. Яго дзеянні былі кваліфікаваныя як махлярства ў буйным памеры і крадзеж з патрапленнем у жыллё. Праваахоўнікі высветлілі, што толькі адна з пацярпелых мела копію пашпарту чалавека, які зняў кватэру, інфармуе сайт sb.by.
