Мадрыд адказаў на абвяшчэнне незалежнасці роспускам парламента Каталоніі
![Мадрыд адказаў на абвяшчэнне незалежнасці роспускам парламента Каталоніі](/sites/default/files/styles/gallery_main/public/2023-08/1506606481.jpg.webp?itok=zq79hAzf)
Мадрыд адказаў на абвяшчэнне незалежнасці Каталоніі роспускам парламента аўтаноміі. Датэрміновыя выбары прызначаныя на 21 снежня, заявіў прэм’ер-міністр Іспаніі Марыяна Рахой. Паводле яго слоў, гаворка ідзе пра хутчэйшае вяртанне парламента “да нармальнага функцыянавання, якое пачынаецца з закона і вяртае закон каталонцам”.
Як паведамляла Еўрарадыё, 27 кастрычніка парламент Каталоніі прыняў дэкларацыю незалежнасці. За яе прагаласавала большасць дэпутатаў. Парламент рэалізаваў вынікі рэферэндума, праведзенага 1 кастрычніка. Большасць яго ўдзельнікаў выказаліся за незалежнасць Каталоніі ад Мадрыда.
Улады Іспаніі не прызнаюць вынікаў рэферэндума, а абвяшчэнне незалежнасці Рахой назваў “злачынствам”. Іспанскі сенат у пятніцу ўхваліў увядзенне прамога праўлення Мадрыда ў Каталоніі, адпраўленне ў адстаўку ўраду аўтаноміі і прызначэнне новых выбараў у мясцовы парламент.
Тым не менш, улады Іспаніі мусяць лічыцца з тым, што каталонскія ўлады маюць значную падтрымку мясцовага насельніцтва. 27 кастрычніка ў цэнтры Барселоны прайшоў шматтысячны мітынг за незалежнасць.