Лукашэнка: "Незразумелыя штурханіна і валтузня... Ну што гэта за саюз такі"
27 лютага Аляксандр Лукашэнка ў чарговы раз выказаўся наконт інтэграцыі з Расіяй. Гэтая тэма была ўзнята падчас сустрэчы з Міхаілам Мясніковічам, старшынёй калегіі Еўразійскай эканамічнай камісіі.
"Не паспелі з Пуціным дамовіцца... увечары ўжо міністры па-свойму трактуюць нашы дамоўленасці... Ну што гэта за саюз такі", — цытуе словы Лукашэнкі БЕЛТА. Кіраўнік дзяржавы меў на ўвазе тэлефанаванне Уладзіміра Пуціна і яго прапанову аб выплаце кампенсацыі Беларусі.
Таксама Аляксандр Лукашэнка заявіў, што Беларусь гатова да "рэальнай інтэграцыі" з Расіяй "па класічных прынцыпах", але без прымусу. Паводле яго слоў, ад пачатку не было гаворкі пра страту незалежнасці.
"Калі разбагацелі, асабліва Расія, пачаліся незразумелыя штурханіна і валтузня, — гаварыў беларускі кіраўнік. — І, як я ўжо сказаў, прымус да інтэграцыі".
Асабліва Лукашэнку абураюць "балбатня" і "прапаганда" ў расійскіх СМІ.
19 траўня ў Мінску пройдзе пасяджэнне Вышэйшага Еўразійскага эканамічнага савета. На ім плануецца падпісаць стратэгію еўразійскай эканамічнай інтэграцыі да 2025 года.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
