Лукашэнка адрэагаваў на ўцечкі інфармацыі: пішыце ад рукі і складайце ў скрыню
Аляксандр Лукашэнка / Reuters
Вярнуцца да папяровых носьбітаў, калі не ў стане абараніць інфармацыю, параіў Аляксандр Лукашэнка сваім чыноўнікам.
Нагадаем, пасля выбараў у сеціве перыядычна пачалі з'яўляцца запісы тэлефонных перамоваў набліжаных да ўлады асоб, а таксама сілавікоў.
"Калі не можаце, як я часта кажу, абараніць у сваіх камп'ютарах інфармацыю, тады вяртайцеся да папяровых носьбітаў. Пішыце ад рукі і складайце ў сябе ў скрыню", — цытуе Лукашэнку выданне "СБ. Беларусь сегодня".
Акрамя таго, ён даручыў сілавікам "актывізаваць дзейнасць па спыненні злачынстваў у сферы высокіх тэхналогій". Гэтая праблема, па яго словах, "архіважная".
Лукашэнка ў аўторак сабраў нараду, дзе абмяркоўвае цэлы шэраг разнапланавых пытанняў — ад саюзнай інтэграцыі і рэабілітацыі неплацежаздольных прадпрыемстваў да ўдасканалення сістэмы маніторынгу грамадскай бяспекі.
