Латвія забараняе ўезд аўтамабіляў, зарэгістраваных у Расіі
Латвія і Літва зачыняюць межы для расійскіх аўтамабіляў / ELTA
Улады Латвіі з 12 верасня забаранілі ўезд на тэрыторыю краіны аўтамабіляў, зарэгістраваных у Расіі. Мытнікі будуць канфіскоўваць машыны, калі іх уладальнік адмовіцца вярнуцца ў Расію ці Беларусь, піша DELFI.
Напярэдадні Еўракамісія ўвяла санкцыі супраць грамадзян Расіі, забараніўшы ім увозіць на тэрыторыю ЕС аўтамабілі, смартфоны і ноўтбукі, набытыя ў Расіі.
Пры гэтым латвійскія ўлады дазваляюць вяртацца з ЕС у Расію на легкавых аўтамабілях з расійскімі нумарамі пры ўмове, што яны выкарыстоўваюцца толькі як сродак перамяшчэння.
Дарэчы, сёння ўлады Літвы папярэдзілі, што пры ўездзе ў краіну будуць канфіскоўваць аўтамабілі з расійскімі нумарамі — незалежна ад таго, грамадзянін якой краіны будзе кіраваць машынай.
Разам з тым у МЗС Фінляндыі заявілі, што аўтамабілі з расійскімі нумарамі па-ранейшаму змогуць уязджаць на тэрыторыю краіны без аніякіх перашкодаў.
