Колькі грошай (магчыма) атрымалі ад Spotify беларускія музыкі за свае хіты
![Лічым ганарары музыкаў](/sites/default/files/styles/gallery_main/public/2024-04/136.jpg.webp?itok=jfmx4t4U)
Лічым ганарары музыкаў / @rubanau_collage
За хіт “А можно я с тобой?” Spotify мусіў налічыць беларускаму музыку Ap$ent 27,5 тысячы долараў. Карыстальнікі стрымінга праслухалі яе амаль 8,5 млн разоў.
Але Ap$ent — не адзіны паспяховы беларускі выканаўца на Spotify. Еўрарадыё прыкідвае, колькі грошай шведскі стрымінг мог заплаціць іншым нашым артыстам за іх гучныя хіты апошняга часу.
Як мы падлічвалі ганарары
У падліках мы арыентуемся на публічныя звесткі пра ўмовы супрацы кампаніі з праваўладальнікамі. Паводле інфармацыі выдання The Wall Street Journal, Spotify у сярэднім плаціць ад траціны да паловы цэнта за адно праслухоўванне і аддае праваўладальнікам ад 75% да 80% выручкі.
Стваральнік музычнага блога “КЛІК” Мікіта Абрамчык лічыць, што варта арыентавацца на ніжні парог ганарару, то-бок 0,33 цэнта за адно праслухоўванне. Паводле гэтай метадалогіі атрымліваецца, што зарабіць 1 тысячу долараў можна ў выніку 303 030 праслухоўванняў. Такі падыход мы і выкарысталі.
Варта памятаць, што лічбы, якія ў нас атрымаліся, — максімальна “брудныя”. Спярша свой адсотак з гэтых сумаў забірае Spotify, а пасля — пасярэднікі, якія стаяць паміж артыстамі і стрымінгам.
“Судно (Борис Рижий)” — “Molchat doma”
Агульная колькасць праслухоўванняў: 267 млн разоў.
Патэнцыйны ганарар: 881 тысяча долараў.
Адна з найбольш пазнавальных песняў мінскіх электроншчыкаў з экзістэнцыйнай творчасцю, якія зрабілі кар’еру на музычным рынку ЗША. Песню пра тое, што паміраць камфортней, чым жыць, у 2020 годзе стала віруснай у TikTok’у. І гэта было чакана — пра што яшчэ спяваць, калі мір перажывае чарговую глабальную эпідэмію?
“Valasy” — “Nürnberg”
Агульная колькасць праслухоўванняў: 6,5 млн разоў.
Патэнцыйны ганарар: 21,6 тысячы долараў.
Яшчэ адзін электронны пост-панк хіт ад гурта, які набірае за мяжой папулярнасць. І што не меней важна — беларускамоўны.
“Воины света” — “Ляпис Трубецкой”
Агульная колькасць праслухоўванняў: 9,9 млн разоў.
Патэнцыйны ганарар: 32,6 тысячы долараў.
Песня-візітоўка некалі легендарнага ска-панк гурта, якая нечакана зрабілася культурным здабыткам украінскай гісторыі. “Воіны света” стала спачатку нефармальным гімнам Еўрамайдану, а затым — вайны з Расіяй, хоць аўтары нічога такога не планавалі.
“Малый повзрослел” — Макс Корж
Агульная колькасць праслухоўванняў: 39,3 млн разоў.
Патэнцыйны ганарар: 129,6 тысячы долараў.
Песня, якая, як губка, усмактала ўсю сутнасць лірыкі поп-спевака, завязаную на дваравой рамантыцы і пацанскім братэрстве. Чуем “Малы пасталеў” — маем на ўвазе Макса Каржа, кажам пра Макса Каржа — адразу згадваем “Малы пасталеў”. Гэтыя рэчы ўжо неразрыўна звязаныя.
“Окей” — Ціма Беларускіх
Агульная колькасць праслухоўванняў: 31 млн разоў.
Патэнцыйны ганарар: 102,3 тысячы долараў.
Філасофская поп-лірыка пра сэнс жыцця ад аўтара хітоў “Мокрыя кросы”, “Вітамінка” і “Алёнка”, якая выйшла ў момант, калі Ціма разыходзіўся з прадзюсарамі лэйбла Kaufman. Магчыма, цяжкі момант у жыцці спевака паўплываў на больш сур’ёзны змест песні, якую моладзь дагэтуль працягвае актыўна слухаць.
“W kolorku Amaretto” — Pan Savyan
Агульная колькасць праслухоўванняў: 933 тысячы разоў.
Патэнцыйны ганарар: амаль 3 тысячы долараў.
Іранічны бэнгер стэндапера Дзмітрыя Саўяна, з дапамогай якога ён (пакуль) беспаспяхова штурмаваў адбор “Еўрарабачання” ад Польшчы. Ведаючы прабіўны характар беларуса, мы не сумняваемся: некалі яму дакладна пашанцуе.
“Груз” — “Петля Пристрастия”
Агульная колькасць праслухоўванняў: 2 млн разоў.
Патэнцыйны ганарар: 6,7 тысячы долараў.
Галоўны рок-гурт Беларусі з чалавечнай і вельмі трывожнай лірыкай пра складанасці жыцця ў постсавецкай прасторы. Прынамсі “Груз” якраз і расказвае пра цяжар існавання, які герой песні намагаецца скінуць са сваіх плячэй.
“Монетка” — LSP
Агульная колькасць праслухоўванняў: 20,3 млн разоў.
Патэнцыйны ганарар: 67 тысяч долараў.
Адна з найбольш заўважных песняў трэцяга студыйнага альбома “Tragic City” гурта LSP. Яе яшчэ паспелі запісаць перад смерцю ад перадазіроўкі наркотыкамі кампазітара і прадзюсара гурта Ромы Англічаніна (Рамана Сащека).
“Emigrant song” — Leibonik
Агульная колькасць праслухоўванняў: 159 тысяч разоў.
Патэнцыйны ганарар: 520 долараў.
Беларускамоўны хіт пра эміграцыю беларусаў пасля 2020 года ад іранічнага барда Сяргея Башлыкевіча, у якім немагчыма не пазнаць сябе.
“Kanapel — Qrawlly DnB Version” — Iva Sativa
Агульная колькасць праслухоўванняў: 427 тысяч разоў.
Патэнцыйны ганарар: 1400 долараў.
Рэйв-версія фальклорнай беларускай песні, якую цікава перасабрала этна-поп спявачка-пачаткоўка з Барысава Яна Смаляга (Іва Саціва — яе творчы псеўданім).
“Месяц” — Palina
Агульная колькасць праслухоўванняў: 6,5 млн разоў.
Патэнцыйны ганарар: 21,4 тысячы долараў.
Аформленая ў мінімалістычнае электра трывожная рэфлексія ад спявачкі Паліны Паланейчык, якую цяпер ведаюць пад псеўданімам Palina.
“Тры чарапахі” — N.R.M.
Агульная колькасць праслухоўванняў: 499 020.
Патэнцыйны ганарар: 1600 долараў.
Легендарная песня ад культавага беларускамоўнага рок-гурта, якая ўжо не аднаму пакаленню беларусаў расказвае, паводле якіх правіл існуе сусвет. На жаль, вялікай колькасцю праслухоўванняў на Spotify песня яшчэ не можа пахваліцца.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.