Хто ў Беларусі зможа называцца рамеснікам?
![Ганчар](/sites/default/files/styles/gallery_main/public/2024-08/swapnil-dwivedi-w46trf64qnc-unsplash.jpg.webp?itok=TJnGKcKB)
Ганчар / unsplash
Да 1 верасня Савет Міністраў павінны вызначыць пералік відаў рамеснай дзейнасці. І з 1 кастрычніка рамеснікамі змогуць называцца толькі тыя, чые работы супадаюць з апісанымі ў пераліку.
Вядома, што ў пералік дакладна ўвойдуць кавальская справа, мастацкая апрацоўка і роспіс вырабаў з дрэва, каменя, керамікі, выраб пражы і некаторыя нацыянальныя віды рамёстваў. Калі мясцовыя ўлады захочуць адрадзіць нейкі пэўны від рамяства ў сваім рэгіёне, яны змогуць дадаткова ўключыць яго ў пералік. Дарэчы, рамеснікам забароняць выкарыстоўваць прамысловыя машыны і абсталяванне.
Працаваць, выплачваючы толькі рамесны збор (6,5 рублёў у месяц), змогуць не ўсе. Для гэтага трэба будзе мець статус народнага майстра, быць сябрам у Беларускім саюзе майстроў народнай творчасці або працаваць на пасадзе майстра народных промыслаў. Рамесны збор змогуць плаціць таксама пенсіянеры і людзі, якія маюць інваліднасць I або II групы або пражываюць у маленькім населеным пункце (да 50 чалавек). Астатнім прыйдзецца плаціць падатак на прафесійны даход (для фізічных асоб гэта 4% ад даходу).
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.