Кантрабанда стала адной з прычын закрыцця памежных пераходаў на літоўскай мяжы
Не ўсе блокпасты на беларуска-літоўскай мяжы абсталяваныя рэнтгенам / D. Umbraso/LRT
Адной з прычын закрыцця двух пунктаў пропуску на беларуска-літоўскай мяжы стала павелічэнне кантрабанды, піша літоўскае выданне LRT са спасылкай на міністра ўнутраных спраў Літвы Агне Білатайтэ.
Яна патлумачыла: не на ўсіх блокпастах з літоўскага боку ёсць рэнтгенаўскае абсталяванне.
Па словах Білатайтэ, усе грузавыя патокі будуць пераведзеныя ў тыя пункты пропуску, дзе такое абсталяванне ёсць.
Паводле звестак літоўскага МУС, блізу 37 адсоткаў кантрабандных тавараў праходзяць праз памежныя кантрольна-прапускныя пункты. У ведамстве кажуць, што пасля закрыцця аднаго чыгуначнага памежнага пункта Стасілас (з беларускага боку — Беняконі) колькасць выпадкаў завозу кантрабанды ў краіну знізіліся.
Другая прычына закрыцця гэтых пагранпераходаў звязана са знаходжаннем у Беларусі вагнераўцаў.
