Каля 20 чалавек прынялі ўдзел у "Ланцугу памяці" каля КДБ (фота)
Акцыя "Ланцуг памяці" прайшла ўвечары 29 кастрычніка каля будынка Камітэта дзяржбяспекі ў Мінску. Каля 20 чалавек, трымаючы ў руках свечкі, без прамоў стаялі каля прыступак КДБ.
У акцыі прынялі ўдзел вядомы палітык Мікалай Статкевіч, яго жонка Марына Адамовіч, рэжысёрка Вольга Нікалайчык, літаратар і палітык Уладзімір Някляеў ды іншыя. Акцыя доўжылася з паўгадзіны. Прадстаўнікі спецслужб назіралі за акцыяй, але нікога не затрымлівалі.
У ноч з 29 на 30 кастрычніка 1937 года былі расстраляныя больш за 100 прадстаўнікоў беларускай інтэлігенцыі — пераважна літаратары. Гэтую падзею называюць "чорнай ноччу беларускай літаратуры".
