Каліновец Дзяніс Урбановіч адказаў на прапанову вярнуцца ў Беларусь
![Дзяніс Урбановіч / svaboda.org](/sites/default/files/styles/gallery_main/public/2023-08/urbanovicz-2203.jpg.webp?itok=MnD1fpHz)
Дзяніс Урбановіч / svaboda.org
Баец палка Каліноўскага Дзяніс Урбановіч, былы старшыня "Маладога фронту", не плануе вяртацца дадому. Пра гэта ён расказаў Радыё "Свабода", каментуючы прапанову, якую сілавікі запісалі на відэа.
Сілавікі правялі ператрус у бацькі Урбановіча на Лагойшчыне. Таксама яны прыходзілі да ягоных сваякоў і сяброў. Пасля ператрусу яны запісалі з бацькам беларускага добраахвотніка відэазварот, у якім заклікалі Дзяніса вярнуцца на радзіму.
"Капітулюй. Можаш прыехаць у Беларусь. Ты такой шкоды не зрабіў тут. Адседзіш якую дзясятку, затое будзеш жыць на Радзіме. А так будзе вельмі дрэнна. Не шукай долі на чужым полі", — гаворыць у тым звароце Урбановіч-старэйшы.
Сам Дзяніс кажа, што сілавікі прыходзілі да ягонага бацькі неаднойчы: "З бацькам — нармальна, але фактычна ён у іх у закладніках, гэта трэба разумець". Вяртацца ў Беларусь пры Лукашэнку хлопец не збіраецца.
Па словах Урбановіча, падобны ціск зазналі і іншыя беларускія добраахвотнікі, якія ваююць ва Украіне. "Беларускае незалежнае войска расце, і Лукашэнка з ягонымі сілавікамі баяцца, што калісьці мы зойдзем і ўсе іхныя нібыта прафесіяналы, якіх некалькі дзясяткаў, будуць знішчаныя. Яны гэтага баяцца — вось і ходзяць. Спрабуюць каго запалохаць, каго перацягнуць на свой бок, каго ўзяць у закладнікі", — мяркуе Урбановіч.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.