Ілан Маск перадумаў набываць Twitter, той падае на яго ў суд
Ілан Маск / TVN
Мільярдэр Ілан Маск заявіў, што перадумаў набываць Twitter, паведамляе Reuters. Здзелка ацэньвалася ў 44 мільярды долараў. Кампанія плануе звярнуцца ў суд, каб дабіцца выканання пагаднення.
Па словах бізнэсмена, Twitter парушыў шэраг палажэнняў дамовы аб зліцці. Напрыклад, кампанія адмовілася падаваць інфармацыю аб фэйкавых і спам-акаўнтах на платформе, што мае "асноўнае значэнне для эфектыўнасці бізнесу". Да таго ж Маску не спадабалася звальненне Twitter высокапастаўленых кіраўнікоў і траціны каманды па прыцягненню талентаў. Гэтым, лічыць мільярдэр, кампанія парушыла абавязальніцтвы "захаваць практычна некранутымі матэрыяльныя кампаненты сваёй цяперашняй бізнес-арганізацыі".
Пасля паведамленняў у СМІ аб рашэнні Маска адмовіцца ад пакупкі, акцыі Twitter ўпалі на 6%. Кампанія плануе звярнуцца ў суд, каб дабіцца выканання пагаднення. Пра гэта заявіў старшыня рады дырэктараў кампаніі Брэт Тэйлар.
"Рада дырэктараў Twitter мае намер закрыць здзелку па цане і ўмовах, якія былі ўзгоднены са спадаром Маскам, і плануе падаць у суд, каб забяспечыць выкананне пагаднення аб зліцці. Мы ўпэўнены, што атрымаем перамогу ў судзе ў Дэлавэры", — напісаў Тэйлар.
The Twitter Board is committed to closing the transaction on the price and terms agreed upon with Mr. Musk and plans to pursue legal action to enforce the merger agreement. We are confident we will prevail in the Delaware Court of Chancery.
— Bret Taylor (@btaylor) July 8, 2022
Аб тым, што Маск плануе купіць Twitter, стала вядома ў красавіку. Здзелка павінна была завяршыцца да канца 2022 года. Бізнесмен збіраўся зрабіць кампанію прыватнай і ператварыць сацсетку ў платформу для "выражэння свабоды слова па ўсім свеце". Ён таксама планаваў, што з цягам часу Twitter стане платным для камерцыйных арганізацый і дзяржаўных структур.
