Іх норавы: санкцыі не працуюць, а праз Беёнсэ расце інфляцыя

16/06/2023 - 08:11

Кароткі агляд сусветных навін / калаж Улада Рубанава, Еўрарадыё

Кароткі агляд сусветных навін / калаж Улада Рубанава, Еўрарадыё

Калі Беёнсэ выходзіць на сцэну ў Стакгольме, у публікі пачашчаецца сэрцабіцце, а па ўсёй Швецыі расце інфляцыя. Што? Не, мы не перагарнулі старонку, і гэта не свецкая хроніка.

Гэта рэгулярны пятнічны агляд сусветных навін ад Еўрарадыё.

Вы што, хочаце як на Кубе?

"Склаўшы рукі на грудзях, у цёмным касцюме з чырвоным гальштукам, ён сядзеў моўчкі з каменным тварам", — так ВВС апісвае другое за год з'яўленне Дональда Трампа ў судзе.

Трампу інкрымінуюць няправільнае захоўванне сакрэтных дакументаў. Няправільнае — гэта значыць, што ён іх нават у ванне трымаў!

У жніўні агенты ФБР знайшлі больш за 100 дакументаў з сакрэтнымі пазнакамі ў прыватным маёнтку Трампа ў Флорыдзе. Абвінавачанне сцвярджае, што ў іх была інфармацыя пра абаронныя і зброевыя магчымасці як ЗША, так і замежных краін. А яшчэ планы магчымага ўдару ў адказ на напад.

Адвакатка Трампа Аліна Хаба назвала абвінавачанні палітычна матываванымі. І параўнала пераслед Трампа з тым, што адбываецца "ў такіх дыктатурах, як Куба і Венесуэла".

У адной з суразмоўніц на сняданак кукуруза. Калісьці яе сям'я магла дазволіць сабе рыс, але цяпер рысу няма. А ў суседзяў няма нават кукурузы — часам яны стукаюць у дзверы і просяць падзяліцца ежай, але дзяліцца няма чым.

Іншы суразмоўца журналістаў калісьці баяўся памерці ад COVID, а цяпер ён баіцца памерці ад голаду: людзі ў ягонай вёсцы паміраюць. Зусім побач. Паўночная Карэя не можа выгадаваць дастаткова прадукцыі, таму раней яна спадзявалася на імпарт. Але пасля таго як межы закрыліся, спыніліся і пастаўкі.

Трэцяя суразмоўніца журналістаў жыве ў сталіцы. Яна часта спыняецца на вуліцы, каб праверыць, ці дыхаюць яшчэ людзі, што ляжаць на зямлі. Часцей за ўсё яны мёртвыя.

Што "дна няма", вы ведаеце і без нас, гэта не навіна. Кепская навіна ў тым, што пакаранне ізаляцыяй для дыктатараў не працуе — ізаляцыя ім падабаецца.

Першыя законы для штучнага інтэлекту

Пераходзім да навін з паралельнага сусвету. Еўрасаюз рыхтуецца падпісаць першы ў свеце збор правілаў па выкарыстанні і развіцці сістэм штучнага інтэлекту. Тэхнакрата просім не турбавацца, лудзіта — не даставаць з куфра шапачку з фальгі. Усё не так кепска, як здаецца.

Намесніца старшыні Еўракамісіі па лічбавых тэхналогіях Маргарэт Вестагер патлумачыла ВВС, чаго варта баяцца проста цяпер.

Інструменты штучнага інтэлекту дазваляюць камп’ютарам здабываць з сеціва велізарную колькасць дадзеных і выкарыстоўваць іх для навучання. І нельга дапусціць, каб гэты сёрфінг ШІ па інтэрнэце паўплываў, напрыклад, на вашу здольнасць атрымаць крэдыт.

Патлумачым: калі ШІ можа выгугліць, што раён, у якім вы жывяце, небяспечны, то, апрацаваўшы гэтыя звесткі, ён параіць банку не выдаваць вам крэдыт. Дыскрымінацыя? Дыскрымінацыя. І пакуль што менавіта такія аспекты выкарыстання тэхналогій могуць быць небяспечнымі — пра выміранне чалавецтва гаворкі пакуль не ідзе.

Прынамсі так думаюць такія аптымісты, як Маргарэт Вестагер. Але антыўтопіі вы паціху пачынайце перачытваць.

Пакармілі "Тамагочы"?

Цяпер пра важныя навіны са свету тэхналогій. У Японіі стварылі тамагочы новага пакалення. Толькі цяпер гэта будзе не проста гадаванец у скрыначцы, гэта будзе цэлы метасусвет тамагочы — тамасусвет. Новыя тамагочы будуць прадаваць за 59 долараў.

Мы спыталі ў чата GPT, якім мог бы быць "тамагочы са штучным інтэлектам".

"Вельмі цікавым!" — адказаў штучны інтэлект.

Беёнсэ падарвала эканоміку Швецыі!

У Швецыі патаннелі прадукты і электраэнергія, але інфляцыя ў траўні ўсё роўна перавысіла чаканы ўзровень. І, хутчэй за ўсё, у гэтым вінаватая Беёнсэ, лічаць аналітыкі.

Паводле Майкла Грана, галоўнага эканаміста па Швецыі ў Danske Bank, візіт Беёнсэ ў Стакгольм можа растлумачыць, чаму стаўка аказалася вышэйшай за чаканую.

"Пачатак сусветнага турнэ Беёнсэ ў Швецыі, падобна, паўплываў на інфляцыю ў траўні", — цытуе The Guardian эканаміста Майкла Грана.

Дзясяткі тысяч прыхільнікаў сцякаліся ў Стакгольм у сярэдзіне траўня, каб трапіць на два канцэрты Беёнсэ, з якіх пачаўся яе першы за 7 гадоў сольны тур. На кожны канцэрт прыйшло 46 тысяч чалавек, гледачам давялося браніраваць жыллё нават за межамі Стакгольма, бо гатэлі былі перапоўненыя. У выніку цэны на жыллё падскочылі, а з імі — і інфляцыя.

Папярэджваем: у адваротны бок правіла не працуе — адсутнасць канцэртаў Беёнсэ не гарантуе эканамічнага цуду. Ну але вы заўважылі.