Хочаце паесці як беларускі дэпутат? Ёсць адно месца!

20 снежня ў Палаце прадстаўнікоў скончылася восеньская сесія. Цяпер дэпутаты раз'язджаюцца працаваць па выбарчых акругах. Пафасны будынак на плошчы Незалежнасці ўпадае ў зімовую спячку.

У буфеце, дзе дэпутаты звычайна абедаюць пасля пасяджэнняў, таксама ўсталёўваецца цішыня. Каб трапіць сюды, патрэбны пропуск ад службы бяспекі. Але аказваецца, у рэстаран, які "корміць" народных абраннікаў, можа трапіць любы ахвочы!

Гэтае месца называецца "Застолле". Ежу для дэпутатаў прыносяць адсюль па пераходах у падвалах Дома ўрада.

Уваход у рэстаран "для людзей" — з вуліцы Мяснікова. Усяго тут шэсць залаў, дзве з якіх носяць назву "Урадавая" і "Дэпутацкая". Прыходзіць лепш апоўдні, таму што да 16:00, калі рэстаран закрываецца, з усяго меню звычайна застаецца суп і што-небудзь адно з другіх страваў.

Недалёка ад уваходу ў "Застолле" дзяжурыць ахоўнік з рацыяй. У тым жа будынку размешчанае "Галоўнае гаспадарчае ўпраўленне" Кіраўніцтва справамі прэзідэнта. Уласна, у падпарадкаванні гэтай арганізацыі і знаходзіцца рэстаран.

Параўнаем. Рыба, запечаная са шпінатам, дэпутатам абыходзіцца ў 3 рублі 55 капеек. Звычайны наведнік рэстарана заплаціць за яе на 8 капеек больш! Філе куранят, запечанае з беконам, пры перамяшчэнні з агульнадаступнага рэстарана ў буфет Дома ўрада таннее на 9 капеек, гуляш з ялавічыны з дранікамі — на 10 капеек.

У сярэднім усе стравы з "дэпутацкага" буфета абыходзяцца народным абраннікам на 5 капеек танней, чым звычайным людзям, якія могуць пакаштаваць іх у рэстаране "Застолле".

Байка ад Чалага