Гайдукевіч, Караткевіч і Улаховіч не здымуцца з прэзідэнцкай гонкі
![Гайдукевіч, Караткевіч і Улаховіч не здымуцца з прэзідэнцкай гонкі](/sites/default/files/styles/gallery_main/public/2023-08/vybary-0909-2.jpg.webp?itok=M1-Xuv9T)
Эканаміст Віктар Цярэшчанка 9 верасня заявіў пра выхад з прэзідэнцкай кампаніі і заклікаў патэнцыйных сапернікаў Аляксандра Лукашэнкі таксама сысці з выбарчай гонкі.
Нагодай для такога кроку з боку Цярэшчанкі сталі праблемы са здароўем. Ён па-ранейшаму ўпэўнены, што яго атруцілі.
Аднак іншыя ўдзельнікі прэзідэнцкай гонкі не падтрымалі заклік Цярэшчанкі. Старшыня ліберальна-дэмакратычнай партыі Сяргей Гайдукевіч у каментары Радыё "Свабода" заявіў, што не можа ўсур’ёз успрымаць сённяшнюю заяву Цярэшчанкі: "Чалавеку хочацца піярыцца. Інтэрнэт усё вытрымае. Заўтра ён зробіць заяву, што ён атручаны спецслужбамі палоніем, радыем, яшчэ чымсьці. Тут патрэбны лекар. Менавіта лекар. Не трэба тут саромецца. Трэба разабрацца, і ўсё будзе добра".
Таццяна Караткевіч спаслалася на тое, што за яе вылучэнне падпісаліся больш за 100 тысяч людзей. Сыход з выбарчай кампаніі яна называе дапамогай Лукашэнку: "Бо калі ёсць альтэрнатыва, гэта — выклік рэжыму. Калі яе няма, мы дапаможам рэжыму".
Мікалай Улаховіч заявіў, што не будзе здымацца з выбараў, бо ішоў да гэтага не адзін год.
Фота: tut.by