Эстонія назаўжды забараніла ўезд Лукашэнку
Аляксандр Лукашэнка / БЕЛТА
Эстонія назаўжды забараніла ўезд Аляксандру Лукашэнку, яго дзецям і асобам, набліжаным да яго. А таксама чыноўнікам, суддзям, сілавікам і прапагандыстам. Агулам у эстонскі санкцыйны спіс увайшлі 273 прозвішчы.
Урад Эстоніі ўвёў абмежаванні ў адносінах да Лукашэнкі і іншых фігурантаў спісу яшчэ ў 2020 годзе. Раней тэрмін іх дзеяння быў абмежаваным, але яго кожны год працягвалі. Цяпер санкцыі ўведзеныя бестэрмінова.
"На працягу амаль пяці гадоў пасля ўвядзення санкцый у Беларусі не адбылося пазітыўных зменаў. Мы не можам заплюшчваць вочы на рэпрэсіі, якія працягваюцца, таму санкцыі павінны захоўвацца без абмежавання па тэрмінах", — прыводзіць ERR словы міністра замежных справаў Маргуса Цахкны.
