Дзед Мароз у Мінску праедзе па праспекце Незалежнасці на трактары
Больш за тысячу казачных персанажаў прымуць чёлета ўдзел у традыцыйным шэсці Дзядоў Марозаў і Снягурак. Пра гэта агенцтву "Мінск-Навіны" распавяла першая намесніца начальніка Галоўнага ўпраўлення ідэалагічнай работы, культуры і па справах моладзі Мінгарвыканкама Віталіна Рудзікава.
Па яе словах, навагодняе тэатралізаванае шэсце Дзядоў Марозаў і Снягурак пачнецца 23 снежня а 17-й гадзіне. Акрамя Дзядоў Марозаў і Снягурак у ім прымуць удзел і іншыя казачныя героі.
Шэсце пройдзе ад плошчы Незалежнасці па праспекце Незалежнасці і вуліцы Леніна, праспекце Пераможцаў да Палаца спорту.
Навінкай гэтага года будзе тое, што галоўны Дзед Мароз і Снягурка паедуць не ў карэце, як летась, а на трактары. Суправаджаць іх будзе картэж з яшчэ васьмі трактараў.
Каля Палаца спорту адбудзецца танцавальны флэш-моб з удзелам гледачоў. А завяршыцца ўсё пнеўмафеерверкам.
