Дзеці-інваліды, якім не далі білеты на Еўрабачанне, усё ж трапяць на канцэр

Дзеці з цэрэбральным паралічам усё ж такі трапяць на дзіцячае "Еўрабачанне". Адзін з арганізатараў конкурсу Белтэлерадыёкампанія выдзеліла дадатковыя білеты. Пра гэта Еўрарадыё распавялі ў прэс-службе кампаніі:

Нагадаем, што сітуацыя ўзнікла два дні таму, калі дзяцей з праблемамі развіцця спачатку запрасілі на канцэрт і прапанавалі ім сядзець у інвалідных вазках. Потым двум дзецям, якія ходзяць самі, адмовілі. Іх маці напісала зварот на сайце Мінгарвыканкама.

"У нас дзіця-інвалід па ДЦП. Дык вось МІНАДУКАЦЫІ такім дзеткам міласціва прапанавала папрысутнічаць на "Еўрабачанні". Спачатку на генрэпетыцыі а 20.00. Калі мы дамовіліся з бабуляй, якая зможа з ім пабыць там (а ўявіце пра цяжкасці таго, ЯК туды такому дзіцяці трапіць!), нам патэлефанавалі і ўсё "перайгралі"! Цяпер трэба быць на самім "Еўрабачанні" і з 18.00 і да ўпору — далёка за поўнач! Але не гэта самае непрыемнае — а тое, што зараз ЯНЫ ВЫРАШЫЛІ, што дзеці павінны быць не проста інваліды, а АБАВЯЗКОВА СЯДЗЕЦЬ Ў ІНВАЛІДНЫХ ВАЗКАХ! Гэта значыць тыя, каму "пашчасціла" ў жыцці спрабаваць перасоўвацца самастойна, з мыліцамі, хадунамі і інш — не могуць ехаць на свята! Бачыце, ЯНЫ ВЫРАШЫЛІ выставіць такіх дзяцей у калясках паміж шэрагамі — як-ніяк ТБ будзе здымаць! А ў нас — уяўляеце — няма інваліднай каляскі! Мы, ведаеце, перасоўваемся самі, хай і з цяжкасцю. Для нас "ЕЎРАБАЧАННЕ" НЕ ПРЫЗНАЧАНА! Цяпер! А ДЗІЦЯ ЗАРАЗ СЯДЗІЦЬ І ПЛАЧА! ШМАТ У ЯГО РАДАСЦІ Ў ЖЫЦЦІ? ДЗЯКУЙ РАЗУМНЫМ ЧЫНОЎНІКАМ ЗА ЧАРГОВУЮ ПАКАЗУХУ! АД УСЯГО МАТЧЫНАГА СЭРЦА — ДЗЯКУЙ!!!"

Зрабіць дзецям-інвалідам падарунак і прывесці іх на "Еўрабачанне" было ініцыятывай ЮНІСЕФ і Міністэрства адукацыі. Афіцыйны прадстаўнік дзіцячага фонду Юрый Аксамітны распавёў Еўрарадыё, што ўсяго для хворых дзетак было выдзелена 500 білетаў. Іх размеркаваннем займалася Міністэрства адукацыі.

Еўрарадыё звярнулася ва Упраўленне сацыяльнай і выхаваўчай працы Мінадукацыі, якое размяркоўвала білеты. Кансультант упраўлення Ларыса Емяльянчык без дазволу кіраўніцтва каментаваць сітуацыю не захацела.

У прэс-службе міністэрства паведамілі, што ўжо разбіраюцца з сітуацыяй.

Віктар Іўчанкаў: "Разбіраемся з гэтым. Ёсць канкрэтныя звароты, мы з імі разбіраемся".

ЕРБ: А як такая сітуацыя ўзнікла?

Віктар Іўчанкаў: "Я паўтараю вам: мы ведаем пра такую сітуацыю і з ёй разбіраемся. Ужо бацькі задаволеныя".

Дзіцячы фонд ЮНІСЕФ узяў на сябе аплату праезду іншагародніх дзяцей і іх харчаванне, а міністэрства павінна забяспечыць іх дастаўку да "Мінск-Арэны". Для гэтага будуць выдзеленыя спецыяльныя аўтобусы, паведаміў Еўрарадыё Юрый Аксамітны.

Паводле яго словаў, у самой "Арэне" будзе ўсё зроблена для таго, каб дзеці маглі праехаць на вазках ад самога аўтобуса. Таксама ім дапамогуць валанцёры ЮНІСЕФ.

"Ідэя ў тым, што дзеці павінны мець роўныя правы", — кажа Юрый Аксамітны.