Добра, што ў Беларусі спрабуюць затрымаць дактароў-замежнікаў — Салавей
![Медыкі, ілюстрацыйнае фота](/sites/default/files/styles/gallery_main/public/2024-04/doktar-1004.jpg.webp?itok=ZzW694ao)
Медыкі, ілюстрацыйнае фота / pixabay.com
Тое, што мінскі рэжым спрабуе ўтрымаць у краіне дактароў-замежнікаў, можна ацаніць толькі станоўча. Такое меркаванне ў гутарцы з Еўрарадыё выказаў доктар Станіслаў Салавей, намеснік прадстаўніцы па сацыяльнай палітыцы Аб'яднагага пераходнага кабінета.
У СМІ з'явіліся паведамленні, быццам недахоп дактароў улады спрабуюць вырашыць за кошт прыцягнення студэнтаў-замежнікаў. Станіслаў Салавей не бачыць у гэтым нічога кепскага.
Па яго словах, гэтыя студэнты вучыліся па тых самых праграмах, што і беларускія, таму ў кампетэнцыі ім адмаўляць не выпадае: "Патэнцыйна і тэарэтычна гэта людзі, якія здаюць тыя ж іспыты, іх вучаць на тых жа кафедрах, па тых жа праграмах. Таму тут я не бачу нічога кепскага, а адны толькі плюсы: дзяржава спрабуе прыцягнуць высокакваліфікаваных спецыялістаў. Гэтак сама робіць Польшча, гэтак сама робіць Германія — спрабуюць прыцягнуць выскокваліфікаваных спецыялістаў. Дактары — адны з іх. Таму — малайцы, без сарказму!".
Станіслаў Салавей кажа, што пры навучанні да студэнтаў-замежнікаў ставяцца не меншыя патрабаванні, чым да беларускіх навучэнцаў: "Да замежных студэнтаў маглі быць крыху зніжаныя патрабаванні: вось табе адзнака — і ідзі. Такое праскоквала, але не сказаў бы, што гэта была масавая з'ява, каб гаварыць, быццам замежнікі, якія скончылі медуніверсітэт, некампетэнтныя. /.../ Таму мы не маем маральнага права казаць, што сярэдні студэнт-замежнік выходзіць з горшымі ведамі".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.