Даўно бачылі сапраўдных эльфаў? Чаму неразумна спрачацца пра "Пярсцёнкі ўлады"

Калумніст Еўрарадыё (у мэтах бяспекі — проста С. В.) разважае пра тое, што не так з тымі, хто занадта занепакоены колерам скуры іншых.
 

Свет не абрынецца

Такім чынам, вы паглядзелі трэйлер "Пярсцёнкаў улады" і таксама схапіліся за галаву "як жа так: эльфы не могуць быць цемнаскурымі!". Добрая навіна: зусім не факт, што вы ксенафоб. Дрэнная навіна: такое ўспрыманне можа быць звязана з убітымі ў вас стэрэатыпамі. Далёка не пазітыўнымі, шчыра скажам.

Галоўнае пытанне: даўно вы бачылі сапраўдных эльфаў, каб сцвярджаць, як яны павінны выглядаць? І, калі вы так упэўненыя ў правільнасці свайго ўяўлення, як ваша нервовая сістэма вытрымлівае тое, што яны ўсюды выглядаюць па-рознаму: ад зялёных карантышак у каўпачках да высокіх бландзінаў? Што ж, могуць быць эльфы і іншага этнасу. Ніхто ж не бярэцца сцвярджаць, што яны, напрыклад, славяне.

Аргументы "гэта не канон" адразу адкідаюцца. Нават экранізацыі не прытрымліваюцца слова ў слова апісанняў ці сюжэтаў арыгіналаў. Вы чыталі "Уладара пярсцёнкаў"? Тады вы ведаеце, што ў фільмах Пітэр Джэксан пакінуў ад кнігі максімум 20%. І свет, як бачыце, не абрынуўся.

Пры гэтым "Пярсцёнкі ўлады" — нават не экранізацыя, а твор "па матывах". Фактычна аўтары серыяла (сцэнарысты, прадзюсары, рэжысёры) зрабілі тое, што хацелі (і на што мелі права), ва ўжо створаным легендарыуме. Падобнае сёння адбываецца і з Marvel (многае ў фільмах ніяк не звязана з першакрыніцай — коміксамі) або "Зорнымі войнамі".
 

А хіба так было?

Але ж, скажаце вы, Толкін дакладна пісаў, што эльфы высокія і белыя. А ў якія часы? Нагадаем, ён пачаў ствараць сусвет толькі праз пару гадоў пасля таго, як у Вялікабрытаніі атрымалі права голасу ўсе жанчыны. А што ўжо чакаць ад ўяўлення пра людзей з іншым колерам скуры? Ні жанчыны, ні іншыя расы, ні меншасці не былі прадстаўленыя ў той час у мастацтве практычна зусім. Ведаеце чаму? Таму што апрыёры кожная істота, здольная мысліць, лічыцца белым мужчынам. Вось такі стэрэатып, сфармаваны стагоддзямі. Ён паступова эразіруе — і абураюцца ў асноўным белыя мужчыны. Самы абражаны клас (іронія).

Свет, калі вы не ў курсе, складаецца не толькі з людзей, падобных да вас. І разнастайнасць — гэта нармальна. Больш таго, прадстаўляць розных людзей — нармальна. Дый наогул, ці важны колер скуры для сюжэта? Ці ўплывае ён на акторскія даныя? Адказы: не.

Вы, можа быць, у курсе, што Уладзімір Высоцкі граў Гамлета. Але ж пачакайце: па Шэкспіру, Гамлет — прынц дацкі! А Высоцкі відавочна не датчанін. І нават не англічанін. Ці паўплывала гэта на пастаноўку ў горшы бок? Не.