Ці варта хвалявацца праз новы варыянт дэльта-штама COVID-19

04/11/2021 - 11:18

COVID-19 / Alamy

Калі вы занадта прывыклі да навін пра дэльта-штам каранавіруса, то ў сусветных навінах медыцыны для вас ёсць нешта новае: субварыянт дэльта-штама AY.4.2. Яго пачынаюць абмяркоўваць усё больш, а першыя выпадкі зарэгістраваныя ўжо і ў Беларусі — хоць галоўны санітарны доктар краіны Аляксандр Тарасенка і двойчы памыліўся, гаворачы пра яго: назваў новым штамам (гэта не так, растлумачым далей) і пераблытаў назвы.

Еўрарадыё расказвае, што на сёння вядома пра AY.4.2 і ці варта хвалявацца праз новы падвід дэльта-штама COVID-19.

Дык штам або не штам?

Пачнём з базавага: AY.4.2, ён жа "дэльта плюс" — гэта не новы штам каранавіруса, а адзін з варыянтаў дэльта-штама. Адрозненне — у новых мутацыях шыпападобнага бялку A222V і Y145H. Прасцей кажучы, па сутнасці, гэта тая самая дэльта, але з невялікімі зменамі — недастатковымі для таго, каб лічыць AY.4.2 асобным штамам.

Аднак ёсць праблема, праз якую ўсе прагнозы і ацэнкі распаўсюджвання могуць быць недакладнымі: каб вылучыць варыянт, недастаткова зрабіць проста ПЛР, трэба правесці секвенаванне (вызначэнне амінакіслотнай або нуклеатыднай паслядоўнасці). А з гэтым, як кажуць Newsweek эксперты, ёсць праблемы. Такім чынам, колькасць выпадкаў менавіта гэтага варыянта можа быць куды большай, чым мяркуецца.

Яшчэ адзін нюанс: як кажа вядучы навуковец INSACOG Анураг Агарвал (Індыя), гэты варыянт часта распаўсюджваецца сярод дзяцей: выпадкаў COVID-19 сярод школьнікаў выяўляюць усё больш і ў Вялікабрытаніі, і ў Індыі, і ў іншых краінах.

Прычына простая: яны куды радзей вакцынаваныя. А ўлічваючы вышэйшую заразнасць, моладзь можа стаць асноўным распаўсюднікам і ў цэлым каранавіруса, і гэтага варыянта.

Ёсць і добрыя навіны

На сёння няма ніякіх звестак пра тое, што AY.4.2 выклікае горшае праходжанне хваробы. Вядома, навукоўцы працягваюць вывучаць гэты варыянт і ёсць папраўка на ўжо згаданую праблему секвенавання, але звесткі пакуль што аптымістычныя.

Выканаўчы сакратар міжведамаснай групы SARS-CoV-2 пры ўрадзе ЗША Самэр Галаўэй паказвае на тое, што няма падстаў і лічыць, што наяўныя вакцыны супраць каранавіруса будуць менш эфектыўныя супраць гэтага варыянта.

Нюанс у тым, што, улічваючы вялікую заразнасць, яшчэ больш важным становіцца пытанне і самой вакцынацыі, і рэвакцынацыі ад каранавіруса. Навукоўцы кажуць, што гэта прыкметна знізіць рызыкі заразіцца, а ў выпадку інфікавання — у разы памяншае шанцы цяжкага праходжання захворвання.