Чыноўнікі перасаджваюцца на "Лады", "Нівы" і "Саманды" і рамантуюць старыя іншамаркі
Але за месяц, што мінуў пасля прыняцця прэзідэнцкага ўказу пра ліміт на кошт службовых аўто, чыноўнікі патрацілі на гэтыя "Лады" болей за 16 мільярдаў
Месяц чыноўнікі дысцыплінавана аб’яўляюць тэндары на закупку службовых аўто ў межах 25 тысяч еўра. Толькі Галоўнаму статыстычнаму ўпраўленню Магілёва ніякі прэзідэнцкі ўказ — не ўказ. Ім патрэбны аўтамабіль за 280 мільёнаў рублёў, а гэта трошкі болей за 25 тысяч еўра.
“Мы нічога не лічылі, нам выдзелілі столькі грошай”, — апраўдваюцца ў Магілёве. Нават Генеральная пракуратура купляе службовыя аўто танней — 6 машын прыкладна па 130 мільёнаў рублёў кожная.
“Прэзідэнцкі ўказ ведаем, таму і працуем з прапановамі да 25 тысяч еўра”, — кажуць Еўрарадыё ў Зэльвенскім райвыканкаме. Старшыня райвыканкама мае "мэрс" 2000 года выпуску, той ужо ад’ездзіў сваё.
“Toyota Camry купляем, бачылі ў інтэрнэце, што машына прыкладна столькі каштуе”, — спасылаюцца ў Зэльве. Яны гуляюць амаль на ўсе 25 тысяч еўра — выдаткоўваюць з мясцовага бюджэту 272 мільёны. Але гэта не ўсё: фінансавы аддзел Зэльвенскага райвыканкама недзе знайшоў яшчэ 200 мільёнаў рублёў на набыццё аўтамабіля і для сваіх фінансістаў.
Гартаю сайт дзяржзакупак і са здзіўленнем заўважаю, што чыноўнікі збольшага пачалі выбіраць звычайныя бюджэтныя аўтамабілі: праз аднаго купляюць "Лады", "Нівы", Renault, а таксама беларускай зборкі Samand і Geely.
Дарэчы, Цэнтр сацыяльнага абслугоўвання Докшыц прынцыпова купляе аўтамабіль беларускай зборкі. Высвятляецца, не па сваім жаданні:
“Нас, можна сказаць, абмежавалі нават у выбары — толькі беларускага вытворцы. Мы, безумоўна, можам і не беларускага вытворцы аўтамабіль замовіць, і расійскага ці яшчэ якога, але тут, асабіста кажучы, выбар невялікі — ці Samand, ці Geely гэты. Geely ўвогуле ніякая машына, ну выбралі Samand”.
Аўтамабіль у Докшыцах купляюць за 16 тысяч долараў.
А вось у Мікашэвічах набываюць звычайную Chevrolet Niva, не таму што ёсць прэзідэнцкі ліміт, а з практычнага разліку. Ніякіх табе іншамарак і дутых "бэхаў".
“Для нас гэта вельмі дарагі аўтамабіль! Пра прэзідэнцкі ўказ ведаем, пра ліміт — нам давялі ўсё. Але адно што — нам трэба аўтамабіль высокі! У нас была паводка сёлета, дык старшыня праехаць не мог нідзе на старой машыне. Бралі ў ЖКГ”, — кажуць тут і дадаюць, што мо і купілі б машыну таннейшую, але каб была высокай. Вось я разумею — палеская практычнасць!
“Сядзім на мяшку з грашыма, а самі жабракі!” — смяюцца ў фінансавым аддзеле Гродзенскага райвыканкама. Кажуць, што з рэспубліканскага бюджэту шасці раёнам Гродзенскай вобласці выдзелілі па 200 мільёнаў на закупку аўтамабіляў. Цікава, што фінансавы аддзел Уздзенскага райвыканкама Мінскай вобласці купляе такі ж аўтамабіль, але на 30 мільёнаў даражэйшы.
“Збіраемся купляць Renault Duster. Ён нам патрэбен для начальніка ўпраўлення, па раёне ездзіць”, — адзначаюць у гарвыканкаме. Кажуць, што ў старшыні райвыканкама аўто круцейшае, хоць назваць марку аўтамабіля не могуць.
Усяго ж на сайце дзяржзакупак за месяц з моманту набыцця моцы прэзідэнцкага ўказу № 119 было аб’яўлена амаль сто аўкцыёнаў ад дзяржаўных арганізацый, абл-, рай- і гарвыканкамаў. Калі ўсе купяць заяўленыя аўтамабілі, гэта пацягне больш як на… 16 мільярдаў рублёў.
