Чалы: Улады ўзяліся за барацьбу з адтокам валюты
Нацбанк выдаў пастанову, якой забараніў банкам “выдаваць крэдыты для набыцця замежнага абсталявання праз пасярэднікаў”.
Падобную пастанову Нацбанк выдаваў перад дэвальвацыяй ў 2011 годзе. Пра гэта Еўрарадыё распавёў эканаміст Сяргей Чалы.
Чалы: “Гэта барацьба з імпартам, адпаведна — барацьба з адтокам валюты. Гэта спроба стрымліваць сітуацыю адміністрацыйнымі сродкамі. Было відавочна, што пойдуць на шляху адміністрацыйных рашэнняў, каб супраціўляцца рыначнаму рашэнню. Мэта простая — зменшыць попыт на валюту. Але адзіны просты сродак — зрабіць рыначны кошт для валюты”.
Нагадаем, у сакавіку 2011-га, напярэдадні дэвальвацыі, Нацбанк забараніў набываць валюту для набыцця замежнага абсталявання на суму больш за 50 тысяч еўра.