Чацвёра пацярпелых у ДТЗ пад Смалявічамі застаюцца ў вельмі цяжкім стане
![Маршрутнае таксі сутыкнулася з грузавіком / @pressmvd](/sites/default/files/styles/gallery_main/public/2023-08/Av.jpg.webp?itok=SDNPDdPD)
Маршрутнае таксі сутыкнулася з грузавіком / @pressmvd
Чацвёра чалавек з маршруткі, якая трапіла ў ДТЗ пад Смалявічамі, застаюцца ў вельмі цяжкім стане. Барацьба за іх жыццё працягваецца.
"Гэта трое пацыентаў з цяжкай спалучальнай траўмай, дзе пераважае траўма органаў брушной поласці. І адзін пацыент, у якога ў клінічнай карціне пераважае цяжкая чарапная траўма", — кажа галоўны пазаштатны хірург-трансплантолаг Міністэрства аховы здароўя Алег Румо.
Яшчэ пяцёра пацыентаў знаходзяцца ў цяжкім стане ў палатах інтэнсіўнай тэрапіі і рэанімацыі. У іх ва ўсіх таксама спалучальныя траўмы: пашкоджаныя косткі шкілета, чэрапа, у некаторых — пашкоджаны галаўны мозг.
Нагадаем, у выніку ДТЗ з удзелам маршрутнага таксі і грузавога аўтамабіля МАЗ 20 лютага загінулі 11 чалавек, у тым ліку двое дзяцей 13 і 14 гадоў. Яшчэ 9 чалавек даставілі ў мясцовую райбальніцу. Пазней іх эвакуявалі ў мінскія клінікі: Мінскую абласную бальніцу, Бальніцу хуткай медыцынскай дапамогі, МНПЦ хірургіі, транспланталогіі і гематалогіі, а таксама ў Дзіцячы хірургічны цэнтр.
Кіроўца маршруткі выжыў, ён знаходзіцца ў бальніцы. Кіроўца МАЗа затрыманы "па падазрэнні ў здзяйсненні злачынства".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.