Будоўля завода пад Брэстам: Свінец — не таполевы пух, ён зваліцца назад у трубу
З такой заявай выступіў бізнэсовец Віктар Лемяшэўскі, чыя кампанія будуе завод акумулятараў пад Брэстам.
Пад Брэстам плануецца будаўніцтва акумулятарнага завода. Ініцыятарам будаўніцтва выступае бізнэсовец Віктар Лемяшэўскі, заснавальнік кампаніі "АйПаўэр". Як паведамляла Еўрарадыё, супраць будаўніцтва завода выступаюць мясцовыя жыхары.
На прэс-канферэнцыі 11 студзеня ў СЭЗ "Брэст" 14 чыноўнікаў і бізнесоўцаў у адзін голас запэўнівалі, што завод будзе абсталяваны самым сучасным рабатызаваным тэхналагічным абсталяваннем еўрапейскай і карэйскай вытворчасці, піша greenbelarus.info.
Як прыклад яны згадвалі Гановер, дзе падобны завод ад ракі аддзяляе 200 метраў, а ад жылых дамоў — 500 метраў. У нямецкім Цвікаў яшчэ адзін завод раўмешчаны за 100 м ад жылых дамоў, а ў польскай Познані завод стаіць за 50 м ад ракі. На Брэстчыне ж завод размешчаны за 750 м ад бліжэйшага населенага пункта.
Па словах чыноўнікаў, 3 кілаграмы свінцу ў год, што будзе выкідваць завод, — гэта дробязі. Найбольш радыкальна выказаўся на гэты конт дырэктар усяго акумулятарнага бізнэсу Віктар Лемяшэўскі: "У вас дома ў кожнага свінец ляжыць, у выглядзе шроту і грузікаў для рыбалкі, гэта вас дагэтуль турбавала? Свінец — цяжкая штука. Калі дапусціць тэарэтычна, што ён вылеціць з трубы, куды ён паляціць? Гэта не таполевы пух, ён зваліцца назад у трубу. Яна знаходзіцца на тэрыторыі завода, за тэрыторыю завода ніякіх выкідаў не будзе".
Ён заявіў, што яго ўласны дом у Пінску размешчаны за 500 м ад заводу: "У мяне растуць дзеці. Я дрэнна выглядаю, спадарства?"