Беларускі праваабаронца Алесь Бяляцкі стаў лаўрэатам Нобелеўскай прэміі міру
![Алесь Бяляцкі / Еўрарадыё](/sites/default/files/styles/main_image_watermark_/public/2023-08/bialiacki-0704.jpg.webp?itok=eulAkaDI)
Алесь Бяляцкі / Еўрарадыё
Беларускі праваабаронца і палітвязень Алесь Бяляцкі стаў лаўрэатам Нобелеўскай прэміі міру. Лаўрэатаў сёлета трое: акрамя Бяляцкага гэта расійскі цэнтр "Мемарыял" і ўкраінскі Цэнтр грамадзянскіх свабодаў.
Лаўрэаты гэтага года "прадстаўляюць грамадзянскую супольнасць у сваіх краінах. Яны цягам многіх гадоў прасоўвалі права крытыкаваць уладу і абараняць асноўныя правы грамадзян", гаворыцца ў заяве Нобелеўскага камітэта. Там палічылі, што лаўрэаты "прыклалі выбітныя намаганні для дакументавання ваенных злачынстваў, парушэнняў правоў чалавека і злоўжывання ўладай. Разам яны дэманструюць значэнне грамадзянскай супольнасці для міру і дэмакратыі".
Старшыня і заснавальнік праваабарончага цэнтра "Вясна" Алесь Бяляцкі ўжо больш за год знаходзіцца ў зняволенні. Яго затрымалі ў мінулым ліпені. Улады абвінавачваюць праваабаронцу ў кантрабандзе і фінансаванні групавых дзеянняў, якія груба парушаюць грамадскі парадак. Бяляцкаму пагражае да 12 гадоў пазбаўлення волі. За 25 гадоў сваёй праваабарончай дзейнасці Бяляцкі быў адзначаны шматлікімі прэміямі і ўзнагародамі, у тым ліку прэміяй свабоды імя Андрэя Сахарава, прэміяй Homo Homini, прэміяй Дзярждэпартамента ЗША, прэміяй Леха Валэнсы і многімі іншымі. Дарэчы, Алеся Бяляцкага раней ужо неаднаразова вылучалі на Нобелеўскую прэмію міру.
BREAKING NEWS:
— The Nobel Prize (@NobelPrize) October 7, 2022
The Norwegian Nobel Committee has decided to award the 2022 #NobelPeacePrize to human rights advocate Ales Bialiatski from Belarus, the Russian human rights organisation Memorial and the Ukrainian human rights organisation Center for Civil Liberties. #NobelPrize pic.twitter.com/9YBdkJpDLU
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.