Беларуска з Токіа: Збіраюся вяртацца, чакаю пакуль мне купяць білет

ЗША, Францыя, Нямеччына, Італія і іншыя краіны ўжо абвясцілі аб эвакуацыі сваіх грамадзян з Японіі. Напрыклад, МЗС Францыі скіроўвае два дадатковыя ўрадавых самалёты і рэкамендуе пакінуць Токіа, выехаўшы на поўдзень краіны альбо ў Францыю. МЗС Расіі таксама заявіў, што родных расійскіх дыпламатаў эвакуююць.

Нават Казахстан вывез з Японіі ўжо каля ста сваіх грамадзян, а таксама 21 грамадзяніна Кыргызстана.

Наша замежнае міністэрства раіць беларусам з'язджаць з блізкіх да АЭС раёнаў сваім ходам.

"Прымаючы да ўвагі высокі ўзровень нявызначанасці, мы рэкамендуем беларусам, якія знаходзяцца ў прэфектурах Міягі, Фукусіма і Эватэ, пераехаць на поўдзень краіны альбо пакінуць Японію рэгулярным рэйсам", – заявіў прэс-сакратар МЗС Андрэй Савіных.

Беларуска Таццяна Цагельнік, якая 5 гадоў правучылася ў японскім універсітэце, з нецярпеннем чакае, калі Міністэрства адукацыі Японіі набудзе ёй квіток у Беларусь.

Тацяна Цагельнік: "Я ўжо не магу адбівацца ад тэлефонных званкоў з дома, ад сваёй маці, бабулі. Шчыра кажучы, у Токіа трохі неспакойна, сёння я прыехала сюды сабраць свае рэчы і зноўку з'еду ў Кіёта, там спакайней".

"У Токіа трохі неспакойна, сёння я прыехала сюды сабраць свае рэчы і зноўку з'еду ў Кіёта, там спакайней"

Па словах Таццяны, усе замежнікі стараюцца як хутчэй выехаць калі не ў родную краіну, дык на захад ці поўдзень Японіі, у бок Кіёта і Осакі. Але гэта няпроста з-за праблем з палівам.

Тацяна Цагельнік: "Я хачу перавезці свае рэчы да знаёмай японкі, бо з'язджаю з кватэры. А знайсці кампанію, якая б пагадзілася зрабіць перавозку, было вельмі цяжка, усе скардзяцца, што не хапае паліва".

Апрача таго, у некаторых крамах была нястача пітной вады і гатовых да ўжывання прадуктаў. Тым часам самі японцы адчуваюць сябе даволі спакойна.

Тацяна Цагельнік: "Японцы жывуць спакойным жыццём, паводзяць сабе спакойна. Тыя марлевыя павязкі, з якімі яны ходзяць – гэта не абарона ад радыяцыі, проста зараз сезон алергіі. Але чуецца, як у грамадскім транспарце людзі абмяркоўваюць праблему на АЭС".

Па словах прэс-сакратара МЗС, дыпламаты знаходзяцца ў кантакце з 75 беларусамі ў Японіі. Але гэта – далёка не ўсе. Відаць тыя, хто стаяць на ўліку ў амбасадзе. Таццяна кажа, што некалькі гадоў таму было дакладна вядома, што ў японскіх муніцыпалітэтах былі зарэгістраваныя амаль 300 беларусаў.

Сёння беларуская амбасада паведаміла Таццяне, што эвакуацыя не плануецца. Але ўчора памочніца консула пачала збіраць тэлефоны і месцазнаходжанне беларусаў, якія ёсць у мэйл-лісце суполкі японскіх беларусаў. Можа, такім чынам рыхтуюцца да мажлівай эвакуацыі, калі раптам сітуацыя пагоршыцца, мяркуе Таццяна.