BBC паказала верагодны маршрут руху вагнераўскіх калон у Беларусь

Вялікая калона аўтамабіляў прыбыла ў лагер, размешчаны ў Асіповіцкім раёне за 100 кіламетраў ад Мінска, пацвярджае ВВС са спасылкай на спадарожнікавыя здымкі.

"Аналіз BBC Verify паказвае, што дзясяткі аўтамабіляў заязджаюць у лагер у вёсцы Цэль — закінутую вайсковую базу на поўдні Беларусі. Папярэднія спадарожнікавыя здымкі, атрыманыя BBC Verify, паказалі, што за два тыдні ў Цэлі паставілі каля 300 намётаў", — пішуць журналісты.

Журналісты паказалі на карце магчымы маршрут калон вагнераўцаў з расійскага Молькіна ў беларускую Цэль.

Сёння маніторынгавая група "Беларускі Гаюн" паведаміла, што на тэрыторыі Беларусі знаходзіцца 2-2,5 тыс. наймітаў.

Адначасова ў тэлеграм-каналах, звязаных з ПВК "Вагнер", апублікавалі кадры, на якіх нібыта намаляваны прыспушчаны сцяг групоўкі на іх галоўнай трэніровачнай базе ў Молькіна на поўдні Расіі. Сцягі часам апускаюць падчас закрыцця вайсковай базы.