Амерыканцы арыштавалі сына дэпутата Дзярждумы РФ

Спецслужбы ЗША арыштавалі Селязнёва на Мальдывах. Яго бацька Валерый Селязнёў з’яўляецца дэпутатам Дзярждумы РФ ад партыі ЛДПР. Паводле тлумачэньняў уладаў ЗША, Раман Селязнёў быў затрыманы ў мінулыя выхадныя ў аэрапорце сталіцы Мальдываў Мале. Яго адразу даставілі на востраў Гуам, паколькі Селязнёў-малодшы абвінавачваецца ў банкаўскім махлярстве і крадзяжах з крэдытных карт шляхам кампутарнага ўзлому, паведамляе ВВС.

Дэпутат Валерый Селязнёў ужо заявіў, што яго сын не можа быць хакерам-ашуканцам, паколькі з'яўляецца інвалідам – быў цяжка паранены выбухам у Марока тры гады таму.

Абвінавачванні з боку ЗША тычацца перыяду з 2009 года, калі Селязнёў-малодшы яшчэ не быў інвалідам. Тэракт у Маракешы здарыўся ў красавіку 2011 года, а справа супраць Рамана Селязнёва ў штаце Вашынгтон была заведзеная ў сакавіку таго ж года.