Аляксандр Лукашэнка — віцебскім аграрыям: "Вярніце даўгі"
Сельскую гаспадарку Віцебскай вобласці трэба істотна мадэрнізаваць. Але даўгі віцебскім аграрыям ніхто спісваць не будзе. Пра гэта Аляксандр Лукашэнка заявіў 28 студзеня на нарадзе, прысвечанай працы аграпрамысловага комплексу Віцебскай вобласці.
З гэтай нагоды ён звярнуўся да прэм'ер-міністра Сяргея Румаса: "Сяргей Мікалаевіч, вы ж банкір, а прапануеце такое".
"Гаворка можа ісці толькі пра тое, што мы вам дамо нейкую аддушыну, каб вы маглі хапануць свежага паветра", — цытуе словы кіраўніка дзяржавы Telegram-канал "Пул Первого".
Лукашэнка запатрабаваў правесці істотную мадэрнізацыю сельскай гаспадаркі Віцебскай вобласці. Ён нагадаў, што гэтая вобласць знаходзіцца ў зоне крытычнага земляробства. Таму тут варта канцэнтравацца на вытворчасці малака і мяса.
"Калі ласка, дайце нам малако і мяса. Калі яны не разумеюць, колькі, давядзіце да іх, як у савецкія часы, заданні, планы, прагнозы, што заўгодна, але давядзіце да іх тыя аб'ёмы, якія яны павінны выдаць перапрацоўчым прадпрыемствам — і хай выконваюць. Планы павінны быць напружанымі настолькі, каб забяспечыць сваю гаспадарчую дзейнасць і вярнуць даўгі", — перадае БЕЛТА патрабаванне кіраўніка Беларусі.
Папярэдняя нарада па сельскай гаспадарцы Віцебскай вобласці адбылася ў Лукашэнкі два месяцы таму — у лістападзе 2019-га.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
