Ад 490 да 4000 рублёў: колькі плацяць работнікам беларускага ваенпрама
![Пакуль эканоміка падае , ваенпрам набірае людзей / калаж Улада Рубанава, Еўрарадыё](/sites/default/files/styles/main_image_watermark_/public/2023-08/355.jpg.webp?itok=x8AZhxUK)
Пакуль эканоміка падае , ваенпрам набірае людзей / калаж Улада Рубанава, Еўрарадыё
Беларускі Дзяржкамваенпрам расказаў у пачатку снежня, што Беларусь і Расія абмеркавалі арганізацыю ў Беларусі вытворчасцяў асобных відаў узбраення і ваеннай тэхнікі. Раней прэм'ер-міністр Раман Галоўчанка адзначыў, што каля $200 млн будуць вылучаныя на абаронную прамысловасць з расійскіх грошай на імпартазамяшчэнне.
Ваенная прамысловасць — сфера закрытая. Дзяржкамваенпрам заявіў, што паводле вынікаў сустрэчы падпісаны пратакол. Больш ніякіх падрабязнасцяў.
Еўрарадыё даведалася, якія з асноўных прадпрыемстваў абароннай прамысловасці пашыраюцца або шукаюць больш за ўсё супрацоўнікаў і колькі грошай там прапануюць.
Самыя высокія даходы — “Пеленг”, “БелОМА”
![От 490 до 4000 рублей: сколько платят работникам белорусского военпрома](/sites/default/files/styles/default_image_paragraph/public/paragraphs/image/%D0%BF%D0%B5%D0%BB%D0%B5%D0%BD%D0%B3.png.webp?itok=SU1eRcG7)
ТАА "Пеленг" заявіла пра пашырэнне вытворчасці. Кампанія распрацоўвае і вырабляе оптыка-электронную прадукцыю ваеннага і цывільнага прызначэння. Там адны з самых высокіх заробкаў, хоць работнікаў адносна іншых прадпрыемстваў трэба не так шмат.
Паводле звестак Рэспубліканскага банка вакансій, туды шукаюць 12 чалавек. З іх пяць — мантажнікі радыёэлектроннай апаратуры і прыбораў. Яшчэ два — работнікі аптычнай вытворчасці. Усім прапануюць ад 2500 да 3000 рублёў. Астатнія пяць вакансій — на месцы наладчыкаў станкоў і маніпулятараў з праграмным кіраваннем, заробак — 3000 рублёў. Ёсць на сайце "Пеленга" і вакансія шліфавальшчыка аптычных вырабаў за 4000 рублёў плюс прывітальны бонус у такім жа памеры.
Паводле вынікаў кастрычніка сярэдні заробак у прамысловасці склаў 1808,8 рублёў.
![От 490 до 4000 рублей: сколько платят работникам белорусского военпрома](/sites/default/files/styles/default_image_paragraph/public/paragraphs/image/%D0%B0%D0%B3%D0%B0%D1%82.jpg.webp?itok=2K56z7V3)
Віцебскі завод радыёдэталяў "Маналіт" шукае 51 работніка. Прадпрыемства часта публікуе навіны пра пастаўкі кандэнсатараў у Расію. На завод патрэбныя, сярод іншых, інжынеры, металізатары, фрэзероўшчыкі, наладчыкі абсталявання.
Самы высокі заробак прапануюць вымяральніку электрафізічных параметраў вырабаў электроннай тэхнікі — ад 1500 да 1556 рублёў. Самы нізкі заробак у вакансіі — на пасаду абпальшчыка радыёкерамікі, п'езакерамікі і ферытаў: ад 750 да 833 рублёў.
У ТАА "АГАТ-сістэмы кіравання" і заробкі даволі высокія, і работнікаў трэба 28 чалавек. Гэта прадпрыемства, сярод іншага, робіць аўтаматызаваныя сістэмы кіравання агульнага і спецыяльнага прызначэння, беспілотныя авіяцыйныя і робататэхнічныя комплексы, сістэмы відэаназірання, навігацыі і маніторынгу транспарту, а таксама сродкі сувязі спецыяльнага прызначэння.
![От 490 до 4000 рублей: сколько платят работникам белорусского военпрома](/sites/default/files/styles/default_image_paragraph/public/paragraphs/image/cheh-1-proizvodstvenyi-potok.SOKei_-870x560.jpg.webp?itok=sySUFE22)
На Аршанскім авіярамонтным заводзе не хапае 32 чалавек. Прычым дэфіцыт кадраў — у кіраўніцтве. Вакантныя месцы генеральнага дырэктара, яго намесніка і вядучага інжынера. Заробак — ад 1200 да 3000 рублёў. Больш сціплы даход абяцаюць інжынеру — ад 490 да 800 руб. Адзін з самых маленькіх заробкаў — у камплектоўшчыкаў авіяцыйнай тэхнікі: ад 490 да 600 рублёў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.