"ЗША чакаюць": украінцам тэрмінова патрэбная дапамога, каб адбівацца на ўсходзе

Расія спрабуе абкружыць Севераданецк і Лісічанск на ўсходзе Украіны. Напярэдадні была прабітая абарона ў раёне Папаснай, што звужае кацёл, у якім апынуліся два гарады.

Еўрарадыё паглядзела, што пішуць пра наступ расіян на ўсходзе Украіны выведкі і эксперты.

Паступовыя поспехі, але невялікія

— За апошнія некалькі дзён расійскія сілы дамагліся ўстойлівых паступовых поспехаў у жорсткіх баях на ўсходзе Украіны, хоць украінская абарона ў цэлым застаецца эфектыўнай, — піша Інстытут па вывучэнні вайны.

Асноўныя намаганні расіян прыпадаюць менавіта на Усходнюю Украіну. Там яны хочуць цалкам захапіць Данецкую і Луганскую вобласці. Таму расійскія войскі занялі некалькі сёлаў на паўночны захад ад Папаснай напярэдадні 27 траўня. Так яны спрабуюць абкружыць Севераданецк і Лісічанск, піша Мінабароны Вялікабрытаніі.

Расія цісне на Севераданецкую кішэню, але Украіна захоўвае кантроль над некалькімі сектарамі, якія абараняюцца. Гэта не дазваляе Расіі цалкам кантраляваць Данбас, паведамляе Мінабароны Вялікабрытаніі.

У Мінабароны ЗША мяркуюць, што на Данбасе Расія дамаглася "паступовага прагрэсу". Поспехі невялікія, нягледзячы на колькасную перавагу.

— Гэтыя поспехі кампенсуюцца поспехамі Украіны на іншых палях бітваў, асабліва вакол Харкава, другога па велічыні горада Украіны... У рускіх вялікія сілы з вялікім патэнцыялам, але ўкраінскія Узброеныя сілы больш чым моцныя... Расійская тактыка і дактрына таксама дапамагаюць украінцам. Рускія спрабуюць пераадолець некаторыя з праблем, з якімі яны сутыкнуліся, — камандаванне і кіраванне, матэрыяльна-тэхнічнае забеспячэнне, манеўраванне. Але ў цэлым тое, што яны робяць, гэта больш лакальныя намаганні. Яны выкарыстоўваюць больш дробныя падраздзяленні для дасягнення больш дробных мэтаў, — піша Мінабароны ЗША.

ЗША могуць выратаваць Славянск, але чакаюць

Адміністрацыя Байдэна збіраецца адправіць Украіне рэактыўныя сістэмы залпавага агню вялікай далёкасці MLRS і HIMARS. Ухваленне можа быць абвешчана на наступным тыдні. Даследчык Bellingcat Хрыста Грозеў адзначае, што для выратавання Славянска яны патрэбныя як мага хутчэй. Горад знаходзіцца ў Данецкай вобласці за 20 км ад Лімана, над якім УСУ страцілі кантроль.

— ЗША сапраўды чакаюць, баяцца, што Украіна можа выкарыстоўваць іх [сістэмы. — Еўрарадыё] для абстрэлу тэрыторыі Расіі. Але яны патрэбныя Украіне, каб не падпускаць сістэмы агню Расіі, таму, калі вы ўсё роўна збіраецеся іх даваць, навошта адкладаць і выклікаць тысячы смерцяў, — піша Грозеў.

У цэлым вайна стала пазіцыйнай і сілы будуць крыху прасоўвацца або губляць пазіцыі, пакуль значна не зменіцца расстаноўка сіл, лічыць Грозеў. Каб такая перамена адбылася на карысць расійскага войска, патрэбнае абвяшчэнне мабілізацыі ў Расіі.

— Калі вайна працягнецца без узрушэнняў сярод асоб [палітычных. — Еўрарадыё], сярод насельніцтва, то ўсё будзе залежаць ад формулы, якую складана пралічыць. Яна ўключае пэўныя пераменныя: колькасць удараў з абодвух бакоў, колькасць вырабленых ракет у Расіі.

Гэта будзе вызначаць перыяд вайны і пераможцу. Гэтыя пераменныя ўключаюць рэальнае жаданне Амерыкі паставіць лятальную зброю, а не тую, што цяпер даецца, хуткасць, з якой яна будзе пастаўляцца.

Таксама важная колькасць дэзерціраў з расійскага боку, як сярод салдат, так і палітыкаў.

— Калі вайна працягнецца без такіх узрушэнняў, то я згодны з прагнозам Буданава [начальнік Галоўнага ўпраўлення выведкі Міністэрства абароны Украіны, генерал-маёр. — Еўрарадыё]. Ён сказаў, што дзесьці да канца жніўня Украіна зможа пачаць ваяваць за тыя пазіцыі, якія былі страчаныя 24 лютага. Зноў жа, калі Амерыка, Германія дадуць тое, што абяцалі.

На думку Грозева, да канца года вайна спыніцца. "Я б паставіў на гэта значную колькасць грошай", — кажа на заканчэнне даследчык.