Зіма сёлета будзе халаднейшая за леташнюю
Зіма 2016/2017 гадоў будзе больш халодная, чым леташняя. Такім прагнозам падзяліўся начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Дзмітрый Рабаў.
Сярэдняя тэмпература зімы 2015/2016 гадоў была -1,5 градуса — гэта вышэй за кліматычную норму на 4 градусы. Цёплымі былі снежань і люты, а сярэдняя месячная тэмпература студзеня апынулася крыху ніжэй за кліматычную норму.
Дарэчы, самай цёплай у Беларусі была зіма 1989/1990 гадоў. Тады сярэдняя тэмпература па краіне была -0,1 градуса. А абсалютны максімум зімовай тэмпературы паветра быў зафіксаваны 21 лютага 1990 года на метэастанцыі Брэст — 17,2 вышэй за нуль.
Самай халоднай сіноптыкі называюць зіму 1939/1940 гадоў: тады сярэдняя тэмпература паветра склала -10,9 градуса.
Гэтай зімой сярэдняя тэмпература паветра ў нашай краіне чакаецца каля кліматычнай нормы, якая складае -5,5 градуса. Крыху цяплейшым за норму абяцаюць люты — на 0,5 градуса.
Сярэдняя колькасць ападкаў у гэтую зіму прагназуецца вышэйшая за кліматычную норму. Паводле нормы, у Беларусі за зіму ў выпадае ў сярэднім 115 мм ападкаў.
