Жыхары Манчэстэра карыстаюцца 200 мовамі

The Guardian распавядае пра “моўны крызіс”, у які трапіла Вялікабрытанія. З 2000 года колькасць універсітэтаў, што прапануюць вывучэнне сучасных замежных моваў, знізілася са 105 да 62. Цягам бліжэйшага дзесяцігоддзя, хутчэй за ўсё, закрыюцца яшчэ 40% кафедраў замежных моваў.

The Guardian: “Вялізныя тэрыторыі краіны засталіся на сёння без хоць якіх моўных школаў. А самі школы, дарэчы, скарачаюць выкладчыкаў, што пагаршае крызіс”.

Брытанскае МЗС усур’ёз пачало хвалявацца, хто ж будзе прадстаўляць краіну на міжнароднай арэне, калі і далей так пойдзе. І каб запоўніць прабел, нават адкрыла сваю ўласную моўную школу, на якую выдаткоўвае мільён фунтаў у год. Пэўныя праблемы бачныя ўжо цяпер: толькі 3% еўрачыноўнікаў — брытанцы, хаця насельніцтва краіны складае 11% ад колькасці жыхароў ЕС. Усё проста: для працы ў еўрапейскіх інстытуцыях трэба валодаць дзвюма замежнымі мовамі.

“Калі я быў хлопчыкам, вывучаць французскую было карысна. Тады дальнія паездкі былі даражэйшыя, чым цяпер. А цяпер нашы гарызонты пашырыліся. Таму расце цікавасць да моваў далёкіх краін: фарсі, бенгальскай ці японскай”, — піша ў сваім блогу на сайце The Telegraph журналіст Даніэль Ханан.

Сапраўды, з 1996 года колькасць жадаючых вывучаць “класічныя” французскую і нямецкую мову скарацілася напалову. Але чаму? Некаторыя кажуць, што віной усяму і ўзмацненне еўраскептыцызму ды ксенафобіі.

Што цікава, калі самі брытанцы не асабліва шануюць чужыя мовы, то замежнікі з ахвотаю вучаць англійскую. І пасля масава сюды пераязджаюць. Як перадае The Independent, нядаўна англійскі Манчэстэр нават абвясцілі самым мульцімоўным горадам у Заходняй Еўропе: згодна з нядаўнім даследаваннем, тут карыстаюцца 200 мовамі. А калі ўлічыць, што ў горадзе жыве каля 480 тысяч чалавек, то яго можна назваць ледзь не самым шматмоўным горадам у свеце.

The Independent: “Манчэстэр разам з Парыжам, Лонданам і Нью-Ёркам прапануе глабалізаваную шматмоўную будучыню. Урокі, атрыманыя першым прамысловым горадам у свеце, які прыняў імігрантаў у XIX стагоддзі, абвяргаюць тых, хто лічыў, што інтэграцыя знішчыць мовы за два пакаленні”.

Цікава, што пасля англійскай найбольш распаўсюджанай мовай у Манчэстэры з’яўляецца ўрду — адна з дзвюх афіцыйных у Пакістане. Але яе даганяюць арабская, кантонская, бенгальская, самалійская і польская.

Фота: getintravel.com