Затрыманых супрацоўнікаў TUT.by пераводзяць у "Валадарку"

Затрыманых супрацоўніц TUT.by пераводзяць у СІЗА, паведамляе ТГ-канал выдання. 

Марыну Золатаву, Вольгу Лойка, Алену Талкачову, Алу Лапатко, намесніцу дырэктара Ірыну Рыбалка і намесніцу галоўнага бухгалтара Марыю Новік перавядуць у СІЗА №1 на Валадарскага. Усе яны маюць статус падазраваных. 

Раней з'яўлялася інфармацыя, быццам Золатаву, Лойка і Талкачову перавядуць у СІЗА Жодзіна.

Галоўную бухгалтарку ТАА “ТУТ БАЙ МЕДИА” Анжэлу Асад таксама ўзялі пад варту, але дзе яна знаходзіцца — невядома. Дырэктарка кампаніі RocketData Дар'я Данілава таксама падазраваная па крымінальным артыкуле. Яна знаходзіцца ў СІЗА КДБ.

Супрацоўнікі TUT.by былі затрыманыя 18 траўня. У гэты дзень на офісе кампаніі і дома ў некаторых супрацоўнікаў прайшлі ператрусы.